XOG: Mucaaradka oo Ka Shaqeynaya Qorshe Cusub oo Ka Dhanka Ah Xasan Sheekh 

MUQDISHO, Soomaaliya – Mucaaradka ayaa qorshe cusub ka wada xaajoonaya, kaas oo looga gol leeyahay sidii loo mideyn lahaa musharraxiinta sare ee ka soo horjeeda Madaxweyne Xasan Sheekh, si ay uga hortagaan hoggaanka hadda jira damaciisa inuu boobo doorashooyinka soo socda.

Kulan ka dhacay hoyga Sheekh Shariif, oo ka qeyb-galeen Xasan Cali Khayre, Maxamed Xuseen Rooble, iyo Cabdiraxmaan Cabdishakuur Warsame, ayaa la sheegay in diiradda lagu saaray sidii loo dhisi lahaa isbahaysi cusub oo ay ku mideysan yihiin musharraxiinta, si loo wajaho marxaladda kala guurka siyaasadeed ee dalka.

Warar lagu kalsoon yahay ayaa tilmaamaya in qorshahan cusub uu yahay mid ka duwan qaab-dhismeedkii hore ee Madasha Samata-bixinta, iyadoo ra’iisul wasaarihii hore Cabdi Faarax Shirdoon “Saacid” uu qayb ka yahay midowgan cusub, taasoo kordhinaysa awoodda siyaasadeed ee ay ku leeyihiin mucaaradka.

Si kastaba, waxaa jira khilaaf gudaha Mucaaradka, taasoo keentay in qaar ka mid ah hoggaamiyeyaasha madasha aysan ka qeyb galin kulanka guriga Sheekh Shariif lagu qabtay. Si kastaba ha ahaatee, ilo dhow oo xog ogaal ah ayaa xaqiijiyay in Madasha Samata-bixinta ay weli jirto oo aan la burburin, islamarkaana ay sii wado dadaallada siyaasadeed iyo wada hadallada Xasan Sheekh oo wali aan wax natiijo ah laga gaarin.

Hoggaamiyeyaasha mucaaradka qaar kamid ah ayaa doonaya in ay sameeyaan madal cusub oo ay kaga shaqeeyaan arrimaha doorashooyinka iyo mustaqbalka siyaasadda dalka. Villa Somalia ayaa la sheegay inay kala jebinayso mucaaradka, oo xubno dhowr ah dhankeeda raacayaan.

Waxaa la filayaa in tallaabadani ay qeyb ka noqoto dagaalka siyaasadeed ee ka dhanka ah Xasan Sheekh, iyadoo weli aan la saadaalin karin in kala duwanaanshahani keeni doono burbur rasmi ah ama xal lagu gaari doono isfaham siyaasadeed.

Si kastaba, midowgan cusub ayaa noqon kara fursad ay mucaaradka ku xoojinayaan awooddooda siyaasadeed iyo kaalintooda mustaqbalka doorashooyinka, taasoo saameyn weyn ku yeelan karta siyaasadda Soomaaliya sanadkan iyo sanadaha soo socda.

GAROWE ONLINE