Xog: Wasiirkii Hore ee Gaashaandhigga Soomaaliya oo Diidey Xil Wareejinta

MUQDISHO –  Garowe Online 

Wasiirkii hore ee Wasaaradda Gaashaandhigga Xukuumadda Federaalka Soomaaliya, Cabdiqaadir Maxamed Nuur, ayaa la sheegay in uu diiday inuu xilka ku wareejiyo Wasiirka cusub ee loo magacaabay wasaaraddaas, Jibriil Cabdirashiid Xaaji Cabdi, kaasoo lagu magacaabay xilkaas 17-kii March.

Wararka uu helay Garowe Online ayaa sheegaya in Wasiir Jibriil wali sugayo xil-wareejin rasmi ah, balse ay muuqato in Wasiirkii hore uusan diyaar u ahayn in uu xilka ku wareejiyo. Ilaa iyo hadda lama shaacin sababta rasmiga ah ee ka dambeysa dib u dhaca xil-wareejinta, hase yeeshee ilo xog-ogaal ah ayaa sheegaya in Ra’iisul Wasaaraha Soomaaliya uusan weli ka jawaabin cabasho rasmi ah oo uu gudbiyey Wasiirka cusub.

Sidoo kale, warar lagu kalsoon yahay ayaa sheegaya in Dowladda Turkiga, oo ah xulafada ugu dhow ee taageerta Villa Somalia dhanka milatariga, aysan ku qanacsaneyn beddelka Cabdiqaadir Maxamed Nuur. Turkigu ayaa kamid ah  dalalka ugu horeeya ee tababara, qalabeeya, kana taageera ciidamada gaarka ah ee Soomaaliya.

Dhawaan, wasiirkii hore ee Gaashaandhigga ayaa bartiisa Facebook ku soo daabacay sawir uu la taagan yahay Madaxweynaha Soomaaliya Xasan Sheekh Maxamuud iyo Madaxweynaha Turkiga, taasoo loo fasiray in ay ahayd farriin siyaasadeed oo muujinaysa xiriirka dhow ee kala dhaxeeya dowladda Ankara.

Dowladda Federaalka ayaa waayahan la tacaaleysay weerarada sii kordhaya ee ay kooxda Al-Shabaab ka geysaneyso gobollada Shabeellaha Dhexe iyo Shabeellaha Hoose, taasoo sii kordhisay baahida ay u qabto taageerada Turkiga.

Dhanka kale, warar diblomaasiyadeed oo soo gaaray Garowe Online ayaa tilmaamaya in dalal dhowr ah oo xiriir amni la leh Soomaaliya ay cadaadis ku saareen Villa Somalia in la beddelo Wasiirkii hore ee Gaashaandhigga, si loo xoojiyo wada-shaqeynta dhanka amniga.

Cabdiqaadir Maxamed Nuur, oo horey uga soo shaqeeyay safaaradda Soomaaliya ee Turkiga isagoo ah qunsul, ayaa la sheegay inuu xiriir dhow la leeyahay hay’adaha sirdoonka Turkiga. Arrintan ayaa keentay walaac ay muujiyeen dalal kale oo Soomaaliya kala shaqeeya arrimaha sirdoonka iyo amniga, iyagoo cabsi ka qaba in xogaha amniga ay si xad dhaaf ah ugu xirmaan hal waddan.

Garowe Online waxa uu si dhow ula socon doonaa isbeddelada arrintan la xiriira iyo tallaabooyinka dowladda Federaalka ay ka qaadi doonto murankan cusub ee hareeyay Wasaaradda Gaashaandhigga.