Coronavirus: DF Soomaaliya oo hakisay duulimaadyadda gudaha

MUQDISHO, Soomaaliya - Dowladda Federaalka ah ee Soomaaliya ayaa ku dhawaaqdey in ay "illaa iyo amar dambe" joojisay duulimaadyadda gudaha, iyadoo meesha ka saartey in amarkaan uu ku socdo gobol gaar ah.

Cabdullaahi Salaad Oomaar, wasiirka gaadiidka iyo duulista hawada, ayaa sheegay in go'aankaan cusub uu daaran yahay ka hortaga faafitaan horleh oo xanuunka dilaaga ah ee Coronavirus uu sameeyo.

"Wax kasta oo la sameynayo waxaa loo sameynayaa siddii loo xakameyn lahaa cudurka wada waaweyn ay iska celin waayeen oo annaga aan iska celin weynay," ayuu u sheegay warbaahinta maxaliga ah.

War-saxaafadeed kasoo baxay xafiiska wasiir Oomaar ayaa lagu sheegay in amarkaan uu dhaqan-galayo laga bilaabo maalinta berri oo Axad ah, wallow uusan carababaabin waqtiga la qaadayo.

"Waxaan qiimeyn doonaa hadba sidda ay xaalada noqoto," ayuu ku jawaabay markii leysku dayey in lagu cadaadiyo jawaab uu ka bixiyo xiliga ay ku eg-tahay xayiraadan horka ah ee lagu soo rogay duulimaadyada.

Xukuumadda dhexe ayaa horey u joojisay duulimaadyadda dibadda muddo laba todobaad ah, taas oo ka dhaqan-gashay guud ahaan waddanka, wallow ay laba maalmood dib ugu fasaxday "xaalado soo kordhay".

Soomaaliya ayaa waxaa laga helay saddex kiis oo fayruskaas ah. Laba kamid ah waxaa qaadey muwaadiniin ka kala yimid Shiinaha iyo Talyaaniga, halka ruuxa kale uu yahay ajnabi la shaqeeya xafiiska Qaramada Midoobay.

QORAALKA WASAARADDA

GAROWE ONLINE