Soomaaliya: Madaxweyne Waare oo la caleema-saarayo
-
Wariyaha Muqdisho Garowe Online
- Posted On 23-10-2017, 10:52AM
JOWHAR, Soomaaliya - Waxaa maanta lagu caleema-saarayaa magaalada Jowhar Madaxweynaha cusub, ee maamulka HirShabeelle Maxamed Cabdi Waare, oo la doortay 16-kii September ee lasoo dhaafay.
Xafladda caleema-saarka waxaa ka qeybgalaya madaxweyniyaasha maamul goboleedyada, Wafdi ka socdo Labada Golle, ee dowladda Federaalka, oo uu hogaaminayo Ra'iisul Wasaare Xasan Cali Khayre.
Madaxweyniyaasha Puntland, Jubbaland, Koonfur Galbeed iyo Galmudug, oo ku midoobay "Gollaha Iskaashiga" oo Kismaayo lagu unkay bishan horaanteeda, ayaa ka qeybgalaya Xafladda.
Qaar kamid ah diblomaasiyiinta beesha caalamka u fadhida Soomaaliya ayaa sidoo kale lagu casuumay munaasabadda caleema-saarka Madaxweyne Waare.
Amniga Jowhar ayaa la adkeeyay, iyadoo wadooyinka lagu daadiyay ciidamada dowladda Federaalka, iyo kuwa AMISOM, waxaana la hakiyay dhaq-dhaqaaqa dadweynaha goobaha ku dhaw Madaxtooyada.
Waare oo ah Madaxweynihii labaad ee uu yeesha maamulka HirShabeelle tan iyo aas-aaskiisa sanadkii tagey dhamaadkiisa, ayaa waxaa laga sugayaa inuu mudo bil ah kusoo magacaabo Gollahiisa wasiiradda.
GAROWE ONLINE
