Faransiiska oo lagu qasbay inuu xiro safaaradiisa dalka Niger

Xiriirka Niger iyo Faransiiska ayaa xumaaday tan iyo markii militariga ay xilka ka tuureen Madaxweyne Maxamed Bazoum.

NAIROBI, Kenya - Faransiiska ayaa albaabada u laabay safaaradda uu ku leeyahay dalka Niger muddo aan la cayimin, iyadoo ay cirka isku sii shareereyso xiisadda u dhaxeysa labada dal.

Safaaradda ayaa sheegtay in aysan "hadda ka dib u shaqeyn karin si caadi ah ama aysan u gudan karin waajibaadkeeda" sababo la xiriira xannibaado ay soo rogtay dowladda militariga ee Niger.

Shaqaalaha safaaradda maxalliga ah ayaa sidoo kale shaqada laga ceyriyay, sidda uu sheegay safiirkii hore ee Faransiiska Sylvain Itté kaasoo soo saarey warqad rasmi ah.

Arrintan ayaa ku soo beegmaysa iyadoo ciidamadii ugu dambeeyay ee Faransiisku ay ka baxeen dalka Niger kadib markii ay amar ku bixiyeen madaxda militariga dalkaas.

Xiriirka Niger iyo Faransiiska ayaa xumaaday tan iyo markii militariga ay xilka ka tuureen Madaxweyne Maxamed Bazoum bishii July kaasoo haatan masiirkiisa uusan caddeyn.

Bishii Sebtembar, Mr Itté iyo qaar badan oo ka mid ah shaqaalaha Faransiiska ayaa ka dhoofay dalka, bil ka dib markii taliskii militariga uu amar ku bixiyay in safiirka uu si degdeg ah u baxo.

GAROWE ONLINE