Hogaamiyihii Mucaaradka Zimbabwe oo geeriyooday
-
Wariyaha Arrimaha Caalamka Garowe Online
- Posted On 14-02-2018, 11:32PM
Johannesburg - Waxaa caawa fiidkii Isbitaal ku yaalla magaalada Johannesburg ee dalka South Africa ku geeriyooday hogaamiyihii mucaaradka wadanka Zimbabwe, Morgan Tsvangirai.
Sarkaal katirsan Xisibigiisa MDC ayaa xaqiijiyay in Tsvangirai uu u geeriyooday xanuunka Kansarka dhanka caloosha uga dhacay, oo mudo la xanuunsanayay.
Tsvangirai ayaa da'diisu ahayd 56 jir.
Hogaamiyahan ayaa mar Ra'iisul Wasaare kasoo noqday dalka Zimbabwe, wuxuuna ahaa siyaasi caan ah, oo dhowr jeer ay xabsi gelisay dowladda Robert Mugabe.
Doorashadii 2008, Tsvangirai ayaa helay codadkii ugu badnaa wareegga kowaad, balse waxaa uga guuleystay Robert Mugabe kadib markii uu isaga baxay doorashada.
Doorashadaasi oo ay hareeyeen musuq iyo ku shubasho codadka, ayaa ugu dambeyntii waxay ku heshiiyeen isaga iyo Mugabe inuu noqdo Ra'iisul Wasaare.
Tsvangirai ayaa markale la tartamay Mugabe 2013, haddana markale ma guuleysan.
Wuxuu ahaa hogaamiye aan cabsan, rug-cadaa u dagaalama dimuqraadiyadda dalkiisa Zimbabwe oo mudo tobonaan sano ah ku jiray xukun kaligii-talis ah.
Xisbiga MDC ayaa ka fekeryay musharaca doorashada sanadka ka dhacaysa Zimbabwe ugu tartami lahayd, maadaama uu xanuunsanayay Tsvangirai.
Morgan Tsvangirai - 1952-2018.
GAROWE ONLINE
