Shiinaha iyo Jabuuti oo taageeray midnimada dhuleed ee Soomaaliya, kana soo horjeestay aqoonsiga Somaliland

BEIJING — Shiinaha iyo Jabuuti ayaa Khamiistii mar kale xaqiijiyay taageeradooda madax-bannaanida iyo midnimada dhuleed ee Soomaaliya, iyagoo ka soo horjeestay in Somaliland loo aqoonsado dal madax-bannaan.

Labada dal ayaa bayaan wadajir ah soo saaray kaddib wada-hadallo toddobaadkan magaalada Beijing ku dhexmaray Wasiirka Arrimaha Dibadda Shiinaha, Wang Yi, iyo dhiggiisa Jabuuti, Cabdulqaadir Xuseen Cumar.

“Labada dhinac waxay si adag u taageerayaan Soomaaliya dadaalladeeda ku aaddan ilaalinta madax-bannaanideeda qaran iyo midnimadeeda dhuleed, waxayna ka soo horjeedaan isku day kasta oo lagu doonayo in Somaliland loo helo aqoonsi diblomaasiyadeed,” ayaa lagu yiri bayaanka wadajirka ah.

Bayaanka ayaa sidoo kale lagu sheegay in labada dowladood ay diiddan yihiin in Somaliland loo aqoonsado dal madax-bannaan, iyagoo ku celiyay in Somaliland ay tahay qayb aan ka go'i karin Jamhuuriyadda Federaalka Soomaaliya.

“Labada dhinac waxay ka soo horjeedaan in Somaliland loo aqoonsado maamul madax-bannaan, waxayna mar kale xaqiijinayaan in Somaliland ay tahay qayb aan ka go'i karin Jamhuuriyadda Federaalka Soomaaliya,” ayaa lagu yiri bayaanka.

Hadalkan ayaa kusoo aadaya xilli uu sii xoogeysanayo muranka diblomaasiyadeed ee la xiriira dadaallada Somaliland ay ku doonayso aqoonsi caalami ah.

Somaliland ayaa sannadkii 1991 ku dhawaaqday inay ka go'day Soomaaliya, tan iyo xilligaasna waxay yeelatay hay'ado siyaasadeed, maamul iyo ciidamo amni oo u gaar ah. Si kastaba, ma aysan helin aqoonsi caalami ah oo ballaaran.

Israa'iil ayaa bishii December ee sannadkii hore noqotay dalkii ugu horreeyay ee si rasmi ah Somaliland ugu aqoonsada dal madax-bannaan, tallaabadaas oo dhalisay cambaareyn uga timid dowladda Soomaaliya iyo dalal kale.

Dowladda Federaalka Soomaaliya waxay Somaliland u aragtaa qayb ka mid ah dhulkeeda, waxayna ku dooddaa in heshiisyada tooska ah ee lala galo maamulka Somaliland iyadoo la hareer marayo dowladda federaalka ay wax u dhimayaan madax-bannaanida iyo midnimada dhuleed ee dalka.

Arrinta Somaliland ayaa noqotay mid xasaasi ka ah Geeska Afrika, oo ah gobol muhiim u ah isu socodka ganacsiga caalamiga ah, marin-biyoodka istaraatiijiga ah iyo danaha amni ee quwadaha gobolka iyo kuwa caalamka.

Shiinaha ayaa hore u muujiyay taageerada uu u hayo midnimada dhuleed ee Soomaaliya, halka Jabuuti, oo xuduud la leh Somaliland isla markaana xiriir dhaqaale iyo mid siyaasadeed la leh Soomaaliya, ay iyaduna ka soo horjeeddo aqoonsiga Somaliland dal madax-bannaan.

Bayaanka wadajirka ah ayaa muujinaya mowqifka ay labada dal ka mideysan yihiin midnimada Soomaaliya, iyadoo ay weli socdaan dadaallada Somaliland ay ku raadineyso aqoonsi caalami ah.

Hoggaanka Somaliland ayaa muddo dheer ku doodayay in maamulka uu dhistay tan iyo 1991 iyo xasilloonida hay'adihiisu ay saldhig u noqon karaan aqoonsi caalami ah. Dowladda Federaalka Soomaaliya ayaa se diiddan sheegashadaas, waxayna Somaliland u aragtaa qayb ka mid ah dalka.

GAROWE ONLINE