Afghanistan: Haweenay kale oo ku dhex-umushay diyaarad
-
WARIYAHA CAALAMKA GAROWE ONLINE
- Posted On 29-08-2021, 06:07PM
LONDON, Britain - Haweenay qaxooti reer Afgaanistaan ah oo u qaxday UK ayaa gabadh ku umushay joog 30,000 oo fiit ah intii ay la socotay duulimaad kusii jeeda magaaladda Birmingham.
Soman Noori, oo 26 jir ah, ayaa ka duushay Dubai kuna socotay Birmingham, iyadoo hore uga soo tagtay Kabul markii ay foolanaysay, sida ay sheegtay shirkadda Turkish Airlines.
Iyadda oo uusan duulimaadka la socon wax dhakhtar ah, xubno ka mid ah shaqaalaha diyaaradda ayaa ka umuliyey gabadha yar oo loo bixiyey magaca Havva.
Turkish Airlines ayaa intaas waxay ku dartey in hooyada iyo cunuguba ay caafimaad qabaan. Ms Noori waxaa wehliyey seygeeda, Taj Moh Hammat, oo 30 jir ah, iyo labadooda carruur ah.
Diyaaradda Turkish Airlines ayaa tibaaxdey in duulimaadka ay ku degtay Kuwait si taxaddar leh ka hor inta aysan u sii gudbin Birmingham oo ay soo degtay 11:45 BST Sabtidii.
Wasaaradda Difaaca ayaa xaqiijisay duulimaadkii ugu dambeeyay ee daad-gureynta UK oo kaliya loogu talagalay muwaadiniinta Afgaanistaan inay ka duushay gegida diyaaradaha ee Kabul galabnimadii Sabtida.
Duulimaadyada haray ee dheeraadka ah oo xukuumadda London ay kasoo daabuleyso Kabul ayaa waxaa kaliya saarnaan doona howlwadeenadda diblomaasiyeed iyo cutubyada militari ee UK.
Sikastaba, duulimaadyadda ayaa socday tan iyo markii kooxda Taliban ay la wareegtay gacan ku heynta caasimadda, iyadoo 31 -kii bisha Ogosto loo qabtay in ciidamada ajaniga ay dalkaas uga baxaan.
GAROWE ONLINE
