Afghanistan oo 530 tan oo gargaar ah u dirtay Gaza

KABUL — Dowladda ku-meel-gaarka ah ee Afghanistan ayaa sheegtay inay 530 tan oo gargaar bani’aadamnimo ah u dirtay marinka Rafah Crossing si loogu gudbiyo Gaza Strip, sida ay Arbacadii ku dhawaaqday wasaaradda warfaafinta.

Bayaan ay wasaaraddu soo saartay ayaa lagu sheegay in gargaarkan, oo lagu diyaariyey laguna soo iibiyey Egypt, ay diyaarisay wafdi ka socday maamulka ku-meel-gaarka ah ee Kabul, waxaana la qorsheeyay in loo qaybiyo qiyaastii 22,000 oo qoys.

Gargaarka ayaa ka kooban cunto, dhar iyo sahay kale oo muhiim ah, iyadoo qiimihiisa lagu qiyaasay ku dhowaad $500,000. Dowladda Afghanistan ayaa sidoo kale ku celisay mowqifkeeda “adag” ee ku aaddan arrinta Falastiin, iyadoo sheegtay in xalkeedu uu ku salaysnaado xaqiiqooyinka taariikhiga ah iyo xuquuqda sharciga ah ee shacabka Falastiiniyiinta.

Mas’uuliyiinta caafimaadka Falastiin ayaa sheegay in ugu yaraan 72,336 qof — badankood haween iyo carruur — lagu dilay dagaalka ay Israa’iil ka waddo Gaza tan iyo Oktoobar 2023, halka 172,213 kale ay ku dhaawacmeen.

Inkasta oo xabbad-joojin ay dhaqan gashay bishii Oktoobar ee sanadkii hore, xafiiska warbaahinta dowladda Gaza ayaa sheegay in ciidamada Israel ay sii wadeen jebinta heshiiska iyagoo fulinaya duqeymo, rasaas iyo weerarro dhulka ah.

Ugu yaraan 757 qof ayaa la dilay, halka 2,111 kalena la dhaawacay tan iyo markii xabbad-joojintu bilaabatay, sida ay sheegeen isla ilo-wareedyadu.

Falastiiniyiinta iyo hay’adaha gargaarka caalamiga ah ayaa sheegay in sahayda soo gaarta Gaza ay weli aad u yar tahay, iyagoo ku tilmaamay xaaladda bani’aadamnimo mid “musiibo ah”, iyadoo nidaamka caafimaadka uu ku dhow yahay burbur.

GAROWE ONLINE