Al-Siisi oo u safraya Imaaraadka kadib wadahadallo uu la yeeshay Madaxweyne Xasan Sheekh

Qaahira — Madaxtooyada dalka Masar ayaa shaaca ka qaaday in Madaxweynaha Masar, Cabdifataax Al-Siisi, uu ku wajahan yahay dalka Imaaraadka Carabta, halkaas oo uu ku tegi doono booqasho walaaltinimo, islamarkaana uu kula kulmi doono Madaxweynaha Imaaraadka Carabta, Sheekh Maxamed Bin Zayed Al-Nahyan.

Madaxtooyadu waxay sheegtay in labada madaxweyne ay ka wada hadli doonaan horumarrada siyaasadeed iyo amni ee ka jira Geeska Afrika, iyo arrimo la xiriira xasilloonida gobolka.

Booqashada Madaxweyne Al-Siisi ayaa imanaysa wax yar kadib markii uu Qaahira kula kulmay Madaxweynaha Jamhuuriyadda Federaalka Soomaaliya, Xasan Sheekh Maxamuud, xilli isbeddello cusub oo dhinaca iskaashiga gobolka ah ay ka socdaan Geeska Afrika.

Soomaaliya ayaa dhowaan hakisay heshiisyadii amniga, difaaca iyo dekedaha ee ay la lahayd Imaaraadka Carabta, tallaabo soo jiidatay indhaha dalalka gobolka, maadaama dib loo eegayo danaha istaraatiijiga ah iyo isbahaysiyada ka jira gobolka muhiimka ah ee Geeska Afrika.

Masar iyo Imaaraadka Carabta ayaa la filayaa inay sidoo kale ka wada hadlaan arrimaha amniga gobolka, horumarrada siyaasadeed iyo dadaallada lagu xoojinayo nabadda iyo xasilloonida Geeska Afrika, sida ay sheegtay madaxtooyada Masar.

Bishii Agoosto 2024, Soomaaliya iyo Masar ayaa kala saxiixday heshiis taariikhi ah oo dhinaca difaaca ah, kaas oo lagu xoojinayo iskaashiga amniga, laguna taageerayo awoodda difaac ee Soomaaliya ee la dagaallanka argagixisada, isla markaana kor loogu qaadayo xasilloonida gobolka.

Heshiiskaasi ayaa dhigaya in Masar ay siiso Soomaaliya taageero ciidan, oo ay ku jiraan hub iyo saraakiil, kuwaas oo qaarkood horey loo geeyay dalka, iyadoo Masar ay sidoo kale ka mid noqonayso waddamada ka qayb qaadanaya hawlgalka cusub ee Midowga Afrika.

— GAROWE ONLINE