Aqalka Cad oo Ballan-qaaday Taageerada Maraykanka ee Amniga Israel oo “Bir ah”

Aqalka Cad ayaa maalintii Sabtida sheegay in taageerada Maraykanka ee amniga Israel ay tahay mid “bir ah,” isagoo ballan-qaaday inuu garab istaagi doono dowladda Yuhuudda isla markaana taageeri doono difaaceeda kadib markii Iran ay weerar diyaaradaha aan duuliyaha lahayn ku qaadday dalkaasi galabnimadii Sabtida. Iran ayaa diyaarado aan duuliye lahayn ka soo riday dhulkeeda iyadoo ku wajahan Israel dhammaadkii Sabtida, maalmo kadib markii hoggaamiyaha sare ee Iran uu ku hanjabay inuu aargudan doono jawaab celin ku saabsan duqeyn lagu qaaday qunsuliyadda Iran ee Suuriya taasoo ay ku dhinteen dhowr jeneraal.

“ Iran waxay bilowdey weerar cirka ah oo ka dhan ah Israel,” ayuu yiri afhayeenka Golaha Amniga Qaranka ee Aqalka Cad Adrienne Watson oo war-saxaafadeed soo saaray Sabtida. “Madaxweyne Biden waxaa si joogto ah xaaladda uga warbixinaya kooxdiisa amniga qaranka waxaana uu kula kulmi doonaa galabta Aqalka Cad.”

Aqalka Cad ayaa sheegay in kooxda madaxweynuhu ay si joogto ah ula xiriireyso mas’uuliyiinta Israeli iyo sidoo kale la-hawlgalayaasha iyo xulafada kale. “Weerarkan ayaa la filayaa inuu socdo dhowr saacadood,” ayuu yiri Watson.

“Madaxweyne Biden wuu caddeeyay: taageeradayada amniga Israel waa mid bir ah,” ayuu Watson sii raaciyay. “Maraykanku wuxuu garab taagan yahay shacabka Israel isagoo taageeraya difaacooda ka dhanka ah hanjabaadaha ka imaanaya Iran.” Waxaa la filayaa in madaxweynuhu uu la kulmo saraakiisha amniga qaranka si ay uga wada hadlaan dhacdooyinka Bariga Dhexe qolka xaaladaha degdeg ah ee Aqalka Cad fiidnimada Sabtida. Saraakiil ay kamid yihiin Xoghayaha Difaaca Lloyd Austin, Xoghayaha Arrimaha Dibadda Antony Blinken, Guddoomiyaha Guddiga Wadajirka ah ee Taliyayaasha Ciidamada Jeneraal Charles Q. Brown, Agaasimaha CIA Bill Burns, Agaasimaha Sirdoonka Qaranka Avril Haines, La-taliyaha Amniga Qaranka Jake Sullivan iyo kuwo kale ayaa kulanka kula jira Biden.

Sullivan ayaa sheegay inuu la hadlay dhiggiisa Israeli, La-taliyaha Amniga Qaranka Hanegbi. Sullivan ayaa sheegay in intii lagu guda jiray wicitaankaas uu “ku celiyay ballan-qaadka Maraykanka ee aan gorgortanka lahayn ee ku aaddan amniga Israel.”

Austin ayaa sidoo kale la hadlay Wasiirka Difaaca ee Israel Yoav Gallant si uu “ugu celiyo taageerada aan gorgortanka lahayn ee Maraykanka ee difaaca Israel.”

GO + AG