Boqorka Bahrain oo Iran ugu baaqay inay joojiso faragelinta dalalka Khaliijka

MANAMA - Boqorka dalka Baxrayn, Hamad bin Isa Al Khalifa, ayaa si adag u dalbaday in dowladda Iiraan ay joojiso faragelinta ay ku hayso arrimaha gudaha ee dalkiisa iyo waddamada kale ee Khaliijka.

Hadal ay baahisay wakaaladda wararka ee rasmiga ah ee dalkaas, ayaa boqorku ku sifeeyay weerarradii dhowaan dhacay inay ahaayeen "gardarro laga naxayo" oo si toos ah loogu beegsaday ammaanka iyo xasilloonida dadka reer Baxrayn. Wuxuu xusay in dhibaatadii adkayd ee dalku soo maray ay kashiftay wejiyo badan oo qarinayay ujeeddooyinkooda gurracan.

Dhammaan lixda waddan ee ku jira Golaha Iskaashiga Khaliijka ayaa la kulmay weerarro kaga yimid dhanka Iiraan, ka dib markii Mareykanka iyo Israa’iil ay duqeymo ka fuliyeen gudaha Iiraan dhammaadkii bishii Febraayo.

In kasta oo Tehraan ay sheegtay inay beegsanaysay saldhigyo iyo dano uu Mareykanku leeyahay, haddana weerarradaas ayaa ku habsaday ilaha tamarta, madaarrada, iyo dhismayaal rayid ah oo ku yaalla dalalka Khaliijka.

Baxrayn ayaa sheegtay in ciidankeeda difaaca hawadu ay soo rideen 194 gantaal iyo 523 diyaaradood oo drones ah ka hor intaan xabbad-joojintii u dhaxaysay Pakistan iyo Iiraan la gaarin 8-dii Abriil.

Boqorka ayaa sidoo kale digniin culus u diray dadka u dhashay dalkiisa ee la shaqeeya cadawga shisheeye, isagoo ku tilmaamay falkaas khiyaano qaran oo aan marnaba la cafiyi doonin. Wuxuu carrabka ku adkeeyay in dhalashadu ay tahay axdi muqaddas ah, qofkii ka baxaana uu luminayo xuquuqda uu dalkaas ku leeyahay.

Toddobaadkan gudihiisa, maxkamadaha Baxrayn ayaa xabsi daa’im ku xukumay shan qof, halkaas oo 25 kale lagu xukumay min toban sano oo xabsi ah ka dib markii lagu helay inay taageerayeen weerarradii Iiraan. Sidoo kale, dowladda ayaa dhalashada kala laabatay 69 qof oo lagu eedeeyay inay xiriir la leeyihiin kooxo khatar ku ah amniga qaranka.

GAROWE ONLINE