Ciidanka Israel oo Daanta Galbeed ku dilay Falastiin

QASA, Falastiin - Ciidamada Israel ayaa toogasho ku dilay Falastiini intii ay socdeen banaanbax ka dhacay Daanta Galbeed ee la haysto, sida laga soo xigtey wasaarada caafimaadka Falastiiniyiinta, oo war-saxaafadeed soo saartey.

Zakaria Hamayel, oo 28 jir ahaa, ayaa rasaastu kaga dhacday xabadka gudaha tuulada Beita, koonfurta Nablus, intii lagu guda jiray mudaaharaad looga soo horjeeday dhul balaarsiga sharci darrada ah ee Israa’iil ay ka waddo dhulka Falastiin, ayay wasaaraddu sheegtay Jimcihii.

Dhawr boqol oo Falastiiniyiin ah ayaa isugu soo baxay banaanbaxa agagaarka Nablus. Qaar ka mid ah dadkii goobta ku sugnaa oo wejiga qarsadey ayaa dhagax ku tuuray askarta isla markaana taayaro ay gubey.

Goob joogayaal ayaa sidaas sheegay in askarta Israa’iil ay rasaas fureen, waxaana ku dhintay hal nin, sida ay sheegtay Wasaaradda Caafimaadka Falastiin.

Ciidanka Israel si dhakhso ah ugama jawaabin codsi ay wakaaladda wararka ee AFP u dirtay si ay faallo uga bixiso eedeyntan kaga timid mas'uuliyiinta Falastiinitiinta.

Talaadadii, ciidamada Israa’iil waxay dileen nin Falastiini ah intii lagu guda jiray duullaankii xerada qaxootiga Al-Amari ee u dhow Ramallah ee Daanta Galbeed ee la haysto.

Ciidamada Israel ayaa howlgal qabqabashado ah ka bilaabay guud ahaan Daanta Galbeed kadib rabshadihii 11 maalmood socday ee u dhexeeya Israel iyo kooxda Falastiiniyiinta ee Hamas ee Gaza oo bilowday 10-kii Maajo kuna dhammaaday is afgarad dhex-dhexaadin ah oo Masaari ay wadday Asbuucii hore.

Dagaalkan ayaa qarxay kadib todobaadyo xiisado isa soo taraya oo ka dhashay dhaq dhaqaaqyada Israa’iil ay ku doonayso inay xoog uga saarto Falastiiniyiinta guryahooda ku yaal Bariga Qudus si loogu banneeyo dadka Yahuuda.

Dibadbaxyada Falastiiniyiinta ee ku saabsan ceyrinta ayaa sababay dareen ah in Israa’iil ay rabto in ay qabsato Masaajidka Al-Aqsa, oo loo arko inuu yahay goobta saddexaad ee ugu qiimaha badan Islaamka.

Laga soo bilaabo 10-kii Maajo, in ka badan 25 Falastiiniyiin ah ayaa lagu dilay iska horimaadyo ka dhacay Daanta Galbeed ee la haysto, halkaas oo ugu yaraan 400,000 oo reer Israa’iiliyiin ah ay la deggan yihiin qiyaastii 2.8 milyan Falastiiniyiin ah.

Daanta Galbeed ayaa la heystay tan iyo 1967, markii ciidamada Israel ay qabsadeen iyaga iyo marinka Gaza dagaalkii loogu magac daray Dagaalkii Lixda maalmood, waana mid kamid ah astaanka iska-hori-imaadyada Falastiin iyo Israel.

GAROWE ONLINE