Ciidanka Sudan oo aqbalay inay sii wadaan wada-xaajoodka kala dhaxeeyo Ciidamada RSF

KHARTOUM - Ciidamada Sudan ayaa Arbacadii shalay ku dhawaaqay inay aqbaleen martiqaad ay u fidiyeen Boqortooyada Sacuudiga, si loo dhammeeyo wada xaajoodyada lagu soo afjarayo colaadda soo jiitameysay dhowr bilood ee u dhaxaysa Ciidamada Sudan & RSF.

War-saxaafadeed ka soo baxay xafiiska Afhayeenka Ciidamada Qalabka Sida ee Suudaan ayaa lagu yiri: “Waxaanu aqbalnay martiqaad aan ku tagayno magaalada Jeddah, si loo dhamaystiro wixii hore loogu heshiiyey, anagoo ka jawaabayna casuumad ka timid labada dal ee dhexdhexaadinta ah (Boqortooyada Sucuudiga iyo Maraykanka).

Isagoo hadalkiisa sii wata ayaa wuxuu yiri: "Cirib-tirka iyo ka adkaanta fallaagada waa hadafka shacabka Suudaan iyo ciidamada qalabka sida, waxaana naga go'an in dalka aan u jiheyno jidka saxda ah."

Tan iyo bartamihii bishii April, Sudan waxaa ka jiray xaalado amni iyo kuwo bini'aadinimo oo khatar ah, taas oo ay ugu wacan tahay dagaallada u dhexeeya ciidanka iyo RSF ee ka socda caasimadda Khartoum.

Iska horimaadka ayaa sababay dhimashada ilaa 10,000 oo qof, barakaca in ka badan 6 milyan, waxaana uu sababay khasaare dhaqaale oo lagu qiyaasay tobanaan bilyan oo doolar.

GAROWE ONLINE