Duqeyn ay Israa'iil la beegsatay xero barakac oo dishay 70 qof

Wasaaradda Caafimaadka Gaza ayaa shaaca ka dhigtay in laga yaabo in dhimashadu ay sii kororto.

DOOXA, Qadar - Wasaaradda caafimaadka ee Gaza ayaa sheegtay in duqayn dhanka cirka ah oo Israel ku beegsatay xerada qaxootiga ee Al-Maghazi oo ku taal bartamaha marinka ay ku dishay ugu yaraan 70 qof.

Afhayeen u hadlay Wasaaradda ayaa wuxuu shaaca ka dhigay in laga yaabo in dhimashadu ay sii kororto marka la eego tirada badan ee qoysaska ku noolaa deegaanka.

Milateriga Israa'iil oo qiil u yeelaya beegsigan aan loo meel-dayin ee rayidka lagu laayay ayaa BBC-da u sheegay in ay eegayaan wararka ku saabsan duqeynta cirka ah.

Warbaahinta Israel iyo Carabta ayaa warisay in Masar oo xuduud la leh Marinka Qaza ay soo bandhigtay hindise cusub oo xabad joojin ah oo dhexmara Israel iyo Xamaas.

Tobaneeyo qof oo dhaawac ah ayaa laga soo qaaday magaalada Maghazi iyadda oo la geeyey isbitaalka Al-Aqsa halkaas oo xaaladooda caafimaad ee liidata lagu daaweynayo.

Muuqaallo aad ugu faafay baraha bulshadda ayaa waxa ay muujinayaan qaar ka mid ah wejiyada carruurta oo ay ka buuxaan dhiig iyo bacaha jirkooda oo bannaanka tuban.

Wasaaradda caafimaadka ayaa wuxuu caddeeyay in saddex guri la weeraray gelinkii dambe ee Axaddii. Sida uu sheegay afhayeenka wasaaradda Ashraf al-Qudra, xaafad ay dadku ku badan yihiin ayaa la burburiyay.

GAROWE ONLINE