FIFA oo madaxweyne dooratay
-
- Posted On 26-02-2016, 08:36PM
ZURICH- Doorasho ka dhacday dalka Switzerland gaar ahaan magalada Zurich, ayaa loogu codeeyay Gianni Infantino oo u dhashay dalka Switzerland inuu noqdo madaxweynaha cusub ee xiriirka kubadda cagta adduunka ee FIFA.
Infantino oo asal ahaan Talyaani ah, ayaa wareeggii ugu dambeeyey ee doorashada FIFA helay115 ka mid ah 207 oo la dhiibtay, isagoo ka adkaaday Sheekh Salman bin Ebrahim al-Khalifa, oo u dhashay dalka Bahrian.
Hogaamiyahan, ayaa guulaystay wareegii labaada, wuxuuna isagoo ka hadlay dareenkiisa sheegay inuu ku faraxsanyahay xilka loo dhiibay islamarkaana uu wax ka badali doono shaqada xiriirka.
"Waxaan aad ugu faraxsanahay inaad ii doorataan madaxweynaha FIFA, waxaana rajaynayaa inaan badalo muuqaalka guud ee xiriirka,"Ayuu yiri Gianni.
Waxaa sidoo kale wareegga labaad ka qeyb galay Ali bin al-Hussein oo u dhashay dalka Jordan oo helay 4 cod, halka Jerome Champagne uusan helin wax cod ah.
Gianni Infantino, ayaa ahaa xoghayaha guud ee xiriirka kubadda cagta Yurub ee UEFA.
Madaxweynayaasha FIFA soo maray iyo waqtiyadooda
1904-1906 Robert Guerin
1906-1918 Daniel B Woolfall
1921-1954 Jules Rimet
1954-1955 Rodolphe W Seeldrayers
1955-1961 Arthur Drewry
1961-1974 Stanley Rous
1974-1998 Joao Havelange
1998-2016 Joseph S Blatter
2016- Gianni Infantino
GAROWEONLINE
