Ifafaalooyin halis ah oo kasoo ifbaxaya xaaladda Afgaanistaan

Todobaadkii hore, is-miidaamin ayaa lagu dilay in ka badan 100 ruux oo ay ku jiraan askar Ameerikaan ah.

KABUL, Afghanistan - Dowladda Mareykanka ayaa ku dhawaaqday inay weerar dhanka cirka ah ka fulisay bariga Afgaanistaan ​​oo ka dhan ah "abaanduulaha" maleyshiyadda xiriir la leh ISIL.

Dhacdan waxay imaanaysaa maalin kadib markii weerar ka dhacay meel ka baxsan gegida diyaaradaha ee Kabul lagu dilay ugu yaraan 175 Afghanistan ah iyo 13 askari oo Mareykan ah.

"Weerarka cirka ee aan duuliyaha lahayn ayaa ka dhacay gobolka Nangarhar ee Afgaanistaan. Tilmaamaha bilowga ah ayaa ah inaan dilnay bartilmaameedka," Captain Bill Urban oo ka tirsan Taliska Dhexe ee Mareykanka ayaa bayaan ku yiri. "Waxaan ognahay in aysan jirin waxyeello rayid ah".

Weerarka Khamiistii waxaa sheegtay kooxda ISIL ee Afgaanistaan ​​- Dawladda Islaamiga ah ee Gobolka Khorasan (ISKP). Bishan Ogosto 26 -keedii ayay ahayd markii laba qof ay isqarxiyeen garoonka diyaaradaha.

Warkaan ayaa imaanaya iyadoo ciidamada Mareykanka ee caawinaya daad-gureynta Afgaanistaan ​​oo aad u doonaya inay ka baxsadaan taliska Daalibaan ay soo saareen digniin Sabtidii kuna aadanaa weerarro ka dhici kara garoonka diyaaradaha Kabul.

Mareykanka wuxuu rumeysan yahay inay weli jiraan hanjabaadyo "gaar ah oo lagu kalsoonaan karo” oo ka dhan ah gegida dayuuradaha kadib qaraxyadii dhimashada badnaa.

Ciidamada reer Galbeedka ee maamula hawada Afgaanistaan ​​ayaa u diyaar garoobay weerarro dheeraad ah kadib markii Mareykanka uu qaaday weerar xagga cirka ah.

Aqalka Cad oo war-saxaafadeed soo saarey duqeyntaas dhanka cirka ah kadib ayaa tibaaxay in maalmaha soo socda ay u badan tahay inay noqdaan kuwa ugu halista badan.

"Runtii waxaan diyaar u nahay oo aan filaynaa isku dayo mustaqbalka," ayuu afhayeenka Pentagon -ka John Kirby u sheegay wariyeyaasha kadib shir jaraa'id oo uu ku qabtey Washington.

Kirby oo tibaaxay in Mareykanka iyo saaxiibadiisa ay sii wadayaan daad-gureynta shacabka ayaa xusay "waxaan la soconaa hanjabaadahaan, aad iyo aad, gaar ahaan, ku dhawaad ​​waqtiga dhabta ah".

GAROWE ONLINE