Ingiriiska iyo Taliban oo wadahadalo ku yeeshay Kabul

Mas'uuliyiinta ka kala socotay labada dhinac ayaa kawada xaajoodey qodobo muhiim ah.

KABUL, Afghanistan - Ergeyga gaarka ah ee Ra’iisul Wasaaraha dalka Britain, Boris Johnson, ayaa Kabul wada-hadallo kula yeeshay xubno sare oo ka tirsan xukuumadda cusub ee Taliban, sidda ay saraakiishu sheegeen.

Simon Gass oo ah xubin sare oo ka tirsan xukuumada Johnson ayaa la kulmay ra'iisul wasaare ku xigeenka Abdul Ghani Baradar iyo Abdul Salam Hanafi Talaadadii, sida uu xusay xafiiska arrimaha dibada ee Britain.

Dhinacyada ayaa la sheegay in ay ka wada hadleen sidii Boqortooyada Midowday ay gacan uga geysan lahayd sidii wax looga qaban lahaa dhibaatooyinka bini’aadannimo ee qotada dheer, “argagixisada” iyo baahida loo qabo marin nabdoon oo loogu talagalay kuwa doonaya inay dalka ka baxaan.

"Waxay sidoo kale sare u qaadeen sida loola dhaqmo dadka laga tirada badan yahay iyo xuquuqda haweenka iyo gabdhaha," ayuu yiri afhayeenka dowladda Britain.

Abdul Qahar Balkhi, afhayeenka wasaaradda arrimaha dibadda ee Daalibaan, ayaa sheegay in kulanka "diiradda lagu saaray doodo faahfaahsan oo ku saabsan soo nooleynta xiriirkii diblomaasiyadeed ee labada dal".

Wuxuu intaas ku daray in wasiirka arrimaha dibedda ee Afgaanistaan ​​uu doonayo in Boqortooyada Midowday "ay bilowdo cutub cusub oo xiriir wax dhisaya".

Stefanie Dekker oo ka tirsan Al Jazeera, oo ka soo waramaya Kabul, ayaa sheegay in booqashadu "muhiim tahay" maxaa yeelay hadda waxaa jira "khad isgaarsiineed oo furan" oo u dhexeeya UK iyo Taliban.

"Waxa aad arkeysaa waa dheel siyaasadeed," ayuu yiri Dekker. "Uma maleynayo inay ka dhigan tahay inay ku dhow yihiin inay si rasmi ah ugu aqoonsadaan inay yihiin dowladda, hase ahaatee wadahadal ayaa jira".

GAROWE ONLINE