Iran: Dalalka Khaliijka Carabta ha eedeeyaan kuwa dagaalka billaabay

TEHRAN – Wasiirka Arrimaha Dibadda ee Iiraan, Abbas Araghchi, ayaa farriin adag u diray waddamada Khaliijka iyo beesha caalamka, isagoo ku adkaystay in dalkiisu uu ku jiro xaalad is-difaac ah ka dib weeraradii dhowaan dhacay.

Araghchi oo ka hadlayay xiisadda kasoo cusboonaatay gobolka, gaar ahaan ka dib hawlgalka Operation Epic Fury, ayaa caddeeyay mowqifka Iiraan ee ku aaddan weerarada ka dhanka ah danaha dalalka martigeliya saldhiggyada Mareykanka.

"Xaq ayaan u leenahay is-difaaca"

Wasiirka ayaa sheegay hadallo ay ka mid ahaayeen: "Haddii ay iyagu xaq u leeyihiin inay qaadaan tallaabo kasta oo lagama maarmaan ah si ay u ilaashadaan xarumahooda, waxaan qabaa inaynu siman nahay. Xaqiiqdii, annagu xaq intaas ka badan ayaan u leenahay inaan qaadno tallaabo kasta oo lagama maarmaan ah si aan u difaacno naftayada iyo dadkayaga. Taas ayaana ah dhab ahaantii waxa aan samaynayno."

Araghchi wuxuu si cad u sheegay in Iiraan aysan mas'uul ka ahayn bilowga colaaddan, isagoo yiri: Dagaal waa nalagu qasbay: "Ogaada tan: kani ma ahan dagaalkayaga. Ma ahan mid aan anaga dooranay. Waxaan ku jirnaa weerar, waxaana difaacaynaa naftayada."

Mas'uuliyadda burburka: Wasiirka ayaa ku dooday inaan Iiraan loo eedeyn karin waxyaabaha ka dhacaya dhanka kale (waddamada Khaliijka), balse ay tahay in la eedeeyo kuwa dagaalka billaabay.

Cidda mas'uulka ah: "Waa inay eedeeyaan kuwa dagaalkan billaabay, waana inay mas'uul ka noqdaan burbur kasta oo ka dhaca gudaha Iiraan iyo gobolka, waayo wax walba waxay ka billowdeen Mareykanka iyo Israa'iil."

Hadalkan ayaa imaanaya xilli dhowr waddan oo Khaliijka ah ay cambaareeyeen weeraro looga soo qaaday dhanka Iiraan, iyadoo Tehran ay ku doodayso in saldhiggyada Mareykanka ee dalalkaas ku yaal loo adeegsaday duqeymo ka dhan ah dhulkeeda.

GAROWE ONLINE