Iran oo sheegtay inay sii wadeyso Dagaalka "Illaa Guusha Laga Gaarayo" iyo Pakistan oo Dadaal Nabadeed Bilowday

ISLAMABAD — Ra’iisul Wasaaraha Pakistan Shehbaz Sharif ayaa ku dhawaaqay in dalkiisu uu diyaar u yahay inuu fududeeyo wadahadallo “macno leh oo natiijo dhab ah leh” si loo soo afjaro dagaalka ka socda Iiraan, xilli xiisadaha gobolka Bariga Dhexe ay sii xoogeysanayaan.

Sharif ayaa sheegay in Pakistan ay si buuxda u taageerayso dadaallada diblomaasiyadeed, isaga oo qoraal uu soo dhigay barta X ku yiri in haddii Maraykanka iyo Iiraan ay oggolaadaan, Islamabad ay martigelin karto wadahadal dhammaystiran oo xal loogu raadinayo colaadda. Wuxuu carrabka ku adkeeyay in nabad lagu gaari karo oo keliya wadahadal iyo is-afgarad.

Dhanka kale, taliska milatariga Pakistan ayaa la sheegay inuu bilaabay dadaallo dhexdhexaadin ah tan iyo Axaddii, kaddib markii Janaraal Asim Munir uu khadka telefoonka kula hadlay madaxweynaha Maraykanka Donald Trump si loo qaboojiyo xaaladda sii kululaaneysa.

Hadalka Sharif ayaa ku soo beegmay xilli weerarro culus ay ka dhacayaan gobolka, iyadoo qiiq laga arkay bartamaha Tel Aviv kaddib markii gantaallo iyo diyaarado drones ah oo laga leeyahay Iiraan ay beegsadeen Israa’iil iyo qaar ka mid ah dalalka Khaliijka.

Trump ayaa dhankiisa dib u dhigay muddo shan maalmood ah hanjabaaddii ahayd in Maraykanku duqeyn doono xarumaha korontada Iiraan haddii aysan furin marinka istiraatiijiga ah ee Strait of Hormuz. Dib u dhigistan ayaa la sheegay inay si ku meel gaar ah hoos ugu dhigtay qiimaha shidaalka ee caalamka.

Si kastaba ha ahaatee, mas’uuliyiinta Iiraan ayaa si adag u diiday jiritaanka wax wadahadal ah. Afhayeenka baarlamaanka, Mohammad Bagher Qalibaf, ayaa ku tilmaamay wararkaasi “been abuur” loogu talagalay in lagu xakameeyo suuqyada. Taliska milatariga Iiraan ayaa sidoo kale ku adkeystay in ay sii wadi doonaan dagaalka “illaa guusha laga gaarayo,” taas oo muujineysa in xal degdeg ah uusan muuqan.

GAROWE ONLINE