Israa'iil oo Gaza ku dishay 13,430 caruur ah tan iyo bishii October

Xafiiska Warfaafinta Falastiin ayaa sidoo kale shaaciyay in 8,900 oo haween ah la dilay muddo 150 maalmood ah.

WASHINGTON, USA - Duqeymaha cirka iyo duulaanka dhulka ee Israel ayaa dilay 13,430 caruur ah tan iyo markii uu bilowday xasuuqa Tel Aviv ee dhulka go’doonsan ee Falastiin, sida uu sheegay xafiiska warbaahinta ee Gaza.

Xafiiska ayaa shaaciyay in 8,900 oo haween ah la dilay muddo 150 maalmood ah, iyaga oo intaas ku daray in 7,000 oo qof oo 70% ay yihiin haween iyo carruur ay weli ku hoos jiraan burburka ama la la'yahay.

Xafiiska warbaahinta ayaa waxa uu hoosta ka xariiqay in 364 shaqaale caafimaad ah iyo 132 wariye ayaa sidoo kale la dilay muddadaas.

Isagoo ka digaya macluusha sii kordhaysa ee Gaza, xafiisku wuxuu sheegay in Israa'iil ay ka hortagtay in cuntada iyo sahayda gargaarka ay soo gaaraan magaalada Gaza.

"Ciidamadda Gumeystaha waxa ay xitaa beegsadeen baabuurta gargaarka ee isku dayaya inay gaaraan gobolka, taasoo sababtay dhimashada tobanaan qof oo cunto u raadsaday qoysaskooda," ayuu kusoo xiray qoraalka.

GAROWE ONLINE