Kenya oo raadinaysa 11 ruux damacsan weeraro argagixiso
-
- Posted On 19-12-2015, 10:20AM
19 December, 2015(GO)-Saraakiisha amniga dalka Kenya ayaa soo bandhigay sawirrada 11 ruux katirsan ururka Al-Shabaab kuwaasi oo ku tuhmayaan inay damacsanyihiin weeraro ka dhaci doona gudaha dalkaasi.
Dowladda ayaa sheegtay shakhsiyaadkan oo dhammaantood rag ah inay yihiin khatar xoog leh isla markaana hubaysan, waxayna shacabka ka codsadeen inay soo ogaysiiyaan hadii ay hayaan xog ku aaddan dadkan iyo goobaha ku suganyihiin.
11-ka qof ayaa sidoo kale lala xiriiriyay inay qayb ka ahaayeen koox deegaanka Mpeketoni ku dishay 60 ruux.
Wargays ka soo baxay Kenya gaar ahaan Nairobi oo lagu magacaabo The Star ayaa shaaciyay weeraradan isagoo soo xiganaya laamaha ammaanka dalkaasi, wuxuuna tilmaamay in la qorsheeyay dhammaadka sannadkan xilligaas oo ku beegan dabaal dagga Kirismaska.
Wuxuu sidoo kale qoray in kooxdan weeraro argagixiso damacsanyihiin horaanta sannadka cusub.
Kenya ayaa ku jirta heeggan kaga hortagayso weeraro qorshaysan uga yimaada kooxda Al-Shabaab oo muddoyinkii dambe dilal iyo dagaallo qorshaysan ka sameeynaysay dalkaasi, tan iyo markii ciidamadeedu soo galeen Somalia.
GAROWEONLINE
