Madaxweynaha Faransiiska oo booqan doono Israa’iil
-
GAROWE ONLINE XAFIISKA MUQDISHO
- Posted On 23-10-2023, 04:58AM
PARIS - Madaxweynaha Faransiiska Emmanuel Macron ayaa ku wajahan magaalada Tel Aviv ee dalka Israa'iil, halkaas oo lagu wado inuu kula kulmo Ra'iisul Wasaaraha Israa'iil Benjamin Netanyahu, sida ay xaqiijisay Madaxtooyada.
Netanyahu ayaa dhawaan ku dhawaaqay in Madaxweynaha Faransiiska iyo Ra'iisul Wasaaraha Holland Mark Rutte ay booqan doonaan Israa'iil.
Booqashada Madaxweynaha Faransiiska ayaa ku soo beegantay in ka badan laba toddobaad ka dib weerarradii ay Xamaas ku qaadday Israa'iil, kaasoo ay ku dhinteen in ka badan 1,400 oo qof, oo ay ku jiraan soddon qof oo Faransiis ah.
Sidoo kale, 7 qof oo Faransiis ah ayaa weli la la’yahay, waxaana la rumeysan yahay in dhammaantood ay gacanta ugu jiraan ururka Xamaas, sida uu horey u sheegay Macron.
Madaxweynaha Mareykanka Joe Biden, Ra'iisul Wasaaraha Jarmalka Olaf Scholz, iyo Ra'iisul Wasaaraha Britain Rishi Sunak ayaa dhammaantood booqday Israa'iil, si la mid ah Ra'iisul Wasaaraha Talyaaniga Giorgia Meloni.
GAROWE ONLINE
