Maraakiibta shidaalka Sacuudiga oo lagu weeraray Badda Cas

SANCA - Kooxda Xuutiyiinta Yemen ayaa sheegatay inay weerar ku qaadeen laba markab shidaal oo Sacuudiga leedahay, kuwaas oo marayay Badda Cas, iyagoo ku eedeeyay inay jebiyeen xannibaad ay kooxda ku soo rogtay maraakiibta u kala goosha dekedaha Sacuudiga.

Afhayeenka militariga Xuutiyiinta, Yahya Saree, ayaa sheegay in labada markab ee la beegsaday ay kala yihiin Encelia iyo Layla, isla markaana weerarka loo adeegsaday gantaallo ballistic ah, gantaallo nooca cruise-ka ah iyo diyaarado aan duuliye lahayn (drones). Wuxuu sheegay in weerarradu sababeen dab ka kacay maraakiibta.

Hay’adda Wararka Sacuudiga (SPA) ayaa xaqiijisay in markabka Encelia uu waxyeello soo gaartay, iyadoo soo xiganaysa mas’uul ka tirsan Hay’adda Gaadiidka Guud ee Sacuudiga. Mas’uulka ayaa sheegay in dhammaan shaqaalaha markabka ay badqabaan.

SPA ayaa cambaareysay weerarka, iyadoo sheegtay inuu yahay xadgudub ka dhan ah shuruucda caalamiga ah ee ilaalisa badbaadada maraakiibta ganacsiga iyo shaqaalahooda. Hay’addu faahfaahin kama bixin sheegashada ku saabsan markabka labaad ee Layla.

Xarunta Hawlgallada Ganacsiga Badda ee UK (UKMTO) ayaa sheegtay inay heshay warbixin ku saabsan markab shidaal oo lagu dhuftay walax aan la aqoon, taasoo dhalisay dab ay shaqaalaha markabku isku dayayeen inay damiyaan.

Xuutiyiinta ayaa sheegay in weerarradan ay ku qasbeen dhowr markab inay ka leexdaan waddooyinkoodii oo ay dib ugu laabtaan halkii ay ka yimaadeen.

Kooxda Xuutiyiinta, oo sidoo kale loo yaqaan Ansar Allah, ayaa 20-kii Luulyo ku dhawaaqday xannibaad badeed ka dhan ah Sacuudiga, iyagoo sheegay in tallaabadan ay tahay jawaab ay ugu magac dareen “il il lagu qaado”.

Sacuudiga ayaa diiday eedeymaha Xuutiyiinta, wuxuuna sheegay inuusan jirin go’doomin lagu hayo shacabka Yemen. Dowladda Riyadh ayaa sidoo kale sheegtay in weerarrada lagu qaaday maraakiibta ganacsiga ay yihiin kuwo jebinaya shuruucda caalamiga ah.

GAROWE ONLINE