Mareykanka oo Golaha Amamanka horgeeyay qaraar la xiriira Gaza

Qaraarkan ayaa waxa uu ka dhashay soo jeedin ka timid madaxwayne Joe Biden.

MUQDISHO, Soomaaliya - Mareykanka ayaa sheegay inuu doonayo in golaha ammaanka ee Qaramada Midoobay uu meel mariyo qaraar lagu taageerayo soo jeedinta ka timid madaxweyne Joe Biden ee lagu soo afjarayo dagaalka Israa'iil ee Gaza.

Qaraarkan ayaa loo qeybiyay qoraal qabyo ah isaga oo ka kooban hal bog oo lawada gaarsiiyay dhamaan 15 xubnood ee uu ka kooban yahay Golaha Ammaanka.

Sidoo kale, qaraarku wuxuu u baahan yahay ugu yaraan sagaal cod oo taageersan mana jiro diidmo uu illaa haatan kala kulmay Mareykanka, Faransiiska, Ingiriiska, Shiinaha ama Ruushka.

Qabyo-qoraalka "wuxuu ku nuuxnuuxsaday muhiimadda ay leedahay in dhinacyadu u hoggaansamaan qodobbada heshiiska marka la isku raaco, iyada oo ujeedadu tahay in la joojiyo colaadda joogtada ah."

"Madax iyo dowlado badan oo uu ku jiro gobolka ayaa taageeray qorshahan, waxaana ugu baaqaynaa golaha ammaanka inay ku biiraan si ay ugu baaqaan hirgelinta heshiiskan iyadoon dib u dhac iyo shuruudo kale jirin," ayay tiri safiirka Mareykanka ee Qaramada Midoobay Linda Thomas-Greenfield.

GAROWE ONLINE