Putin oo si rasmi ah ugu tartamaya doorashada madaxtinimada Ruushka

Xukunka Putin wuxuu noqon doonaa kii ugu dheeraa ee Ruushka tan iyo qarnigii 18-aad.

Moscow (GO) - Guddiga doorashada dhexe ee dalka Ruushka ayaa si rasmi ah u diiwaangeliyay madaxweyne Vladimir Putin inuu u tartamo doorashada madaxtinimada ee soo socota.

Wakaaladda wararka ee Interfax ayaa ka soo xigatay guddiga doorashada dhexe ee Ruushka maanta oo isniin ah in magaca madaxweynaha Ruushka Vladimir Putin uu u diiwaan gashan yahay musharrax u tartamaya doorashada madaxtinimada ee la qorsheeyay inay qabsoonto 15-ka ilaa 17-ka March.

Taageerayaasha iyo kuwa ka soo horjeedaba waxay filayaan in Putin uu ku guuleysana doono madaxtinimada Ruushka ee lix-da sano ee soo socota.

Haddii Putin uu awoodo inuu ku guuleysto qorshihiisa, xukunkiisu wuxuu noqon doonaa kii ugu dheeraa ee Ruushka tan iyo qarnigii siddeed iyo tobnaad.

GAROWE ONLINE