Sacuudiga oo soo dhaweeyay aqoonsiga wadamada Yurub ay siiyeen dowladda Falastiin

RIYADH - Tallaabo loo qaaday dhanka geedi socodka nabadda ee Bariga Dhexe, Wasaaradda Arrimaha Dibadda ee Sacuudi Carabiya ayaa sheegtay inay soo dhawaynayso go’aanka ay Boqortooyada Norway, Boqortooyada Spain, iyo Jamhuuriyadda Ireland ku aqoonsadeen dawladda Falastiin.

Talaabadan ayaa loo arkaa talaabo wanaagsan oo loo qaaday sidii nabad buuxda oo cadaalad ah loogu heli lahaa gobolka, iyadoo la waafajinayo heshiis caalami ah oo ku saabsan xaqa ay dadka reer Falastiin u leeyihiin aayo ka tashi.

Go’aanka ay gaareen wadamadan Yurub ayaa ah mid ka tarjumaysa is-afgaradka caalamiga ah ee ku aadan xaqa ay shacabka Falastiin u leeyihiin inay aayahooda ka tashadaan. Wasaaradda arrimaha dibadda ee Sacuudi Carabiya ayaa ugu baaqday dalalka kale inay ku daydaan jidkooda, taasoo ah inay gacan ka geystaan ​​sidii loo gaari lahaa "dariiq la aamini karo oo aan laga laaban karin, taasoo lagu gaaro nabad cadaalad ah oo waarta oo buuxisa xuquuqda dadka Falastiiniyiinta."

Horumarkan dublamaasiyadeed ayaa imanaya iyada oo ay jiraan xiisado iyo colaado gobolka ka socda, taas oo muujinaysa muhiimadda ay leedahay aqoonsiga caalamiga ah ee dawladda Falastiin oo ah tallaabo muhiim ah oo loo qaaday xallinta khilaafka Israel iyo Falastiin.

Talaabadan ayaa sidoo kale loo arkaa mid sare u qaadaysa xalka labada dal, kaas oo odorosa in dawlad madax banaan oo Falastiiniyiin ah ay si nabad ah ugu wada noolaadaan Israel.

Aqoonsiga Norway, Spain, iyo Ireland waxa uu daliil u yahay taageerada sii kordheysa ee caalamiga ah ee lagu dhisayo dowlad ay Falastiiniyiintu leeyihiin, iyadoo la rajeynayo in aqoonsigani uu wax ka tari doono geeddi-socodka nabadda ee Bariga Dhexe.

GAROWE ONLINE