Safarka JD Vance ee Switzerland oo dib u dhacay, iyadoo xiisado cusub ay hareeyeen heshiiska Mareykanka iyo Iiraan

Madaxweyne Ku-xigeenka Mareykanka, JD Vance, ayaa dib u dhigay safar uu qorsheynayay inuu ku tago Switzerland si uu u bilaabo wareeg cusub oo wada-hadallo nabadeed oo lala yeesho Iiraan, kadib markii ay soo baxeen caqabado cusub oo la xiriira hirgelinta heshiiskii is-afgaradka ahaa ee lagu soo afjarayay colaadda labada dhinac.

Vance ayaa maalmihii la soo dhaafay si xooggan u difaacayay heshiiska ay kala saxiixdeen Washington iyo Tehran, isagoo sheegay in heshiiskaasi uu furay 60 maalmood oo wadahadal rasmi ah oo lagu gaari karo heshiis kama dambeys ah.

Wararka ayaa sheegaya in wafdiga Mareykanka ay diyaar u ahaayeen inay habeenkii Khamiista u ambabaxaan Switzerland, balse qorshahaas ayaa si lama filaan ah loo hakiyay kadib weerarro ay Israa’iil ka geysatay koonfurta Lubnaan.

Dhinaca Iiraan, waxaa la sheegay in weli aysan jirin go’aan rasmi ah oo ku saabsan ka qaybgalka wada-hadallada cusub, maadaama Tehran ay marka hore doonayso inay aragto in qodobadii heshiiska ku meel gaarka ahaa si dhab ah loo fulinayo, gaar ahaan kuwa khuseeya joojinta hawlgallada militari ee Lubnaan.

Heshiiskan, oo ay kala saxiixdeen madaxda Mareykanka iyo Iiraan, ayaa loo soo bandhigay inuu yahay tallaabo lagu soo afjarayo bilooyin badan oo xiisad iyo dagaal ah, hase yeeshee wali waxaa jira su’aalo badan oo la iska weydiinayo sida loo fulin doono iyo heerka ay dhinacyadu uga go’an tahay inay ilaaliyaan qodobadiisa.

Dhanka Lubnaan, warbaahinta dowladda ayaa sheegtay in ugu yaraan saddex qof lagu dilay weerarro cusub oo ay Israa’iil ka fulisay koonfurta dalkaas, inkastoo heshiisku uu si cad u xusay in la joojiyo hawlgallada militari ee dhammaan furimaha dagaalka, oo ay ku jirto Lubnaan.

Isla markaana, khilaafka siyaasadeed ee u dhexeeya Washington iyo Tel Aviv ayaa sii muuqanaya. Falanqeeyayaal badan ayaa aaminsan in heshiiskan uu abuuray kala aragti duwanaansho weyn oo u dhexeeya Madaxweyne Donald Trump iyo Ra’iisul Wasaaraha Israa’iil Benjamin Netanyahu, iyadoo Israa’iil ay ka walaacsan tahay saameynta heshiisku ku yeelan karo siyaasaddeeda iyo istaraatiijiyaddeeda amni.

Dhanka kale, ciidamada Mareykanka ayaa ku dhawaaqay inay soo afjareen xayiraaddii badda ee ay saareen dekedaha Iiraan, taasoo qayb ka ah tallaabooyinka lagu taageerayo wada-hadallada socda. Si kastaba ha ahaatee, maraakiibta ciidamada Mareykanka ayaa sii joogi doona gobolka si ay ula socdaan fulinta heshiiska iyo u hoggaansanaanta qodobadiisa.

GAROWE ONLINE