Taliban oo “90 cisho gudahooda ku qabsan karta Kabul”
-
WARIYAHA CAALAMKA GAROWE ONLINE
- Posted On 13-08-2021, 10:19AM
KABUL, Afgaanistaan - Taalibaan ayaa 90 maalmood gudahood ku qabsan karta Kabul, caasimadda Afgaanistaan - wax ka yar sidii markii hore loo maleeyey - iyada oo ay baxayaan ciidamada Mareykanka, sida ay sheegeen Reuters iyo warbixinta Washington Post oo soo xiganaya qiimeynta sirdoonka Mareykanka.
Kooxdu waxay qabsadeen sagaal caasimad goboleed oo ku yaal Afgaanistaan tan iyo Jimcihii iyagoo horumar milateri ku jira. Taalibaan ayaa go'doomin karta Kabul muddo 30 maalmood gudahood ah, sida uu saadaaliyey sarkaal u dhuun daloola qiimaynta una waramay Reuters.
Sarkaalka Mareykanka ah oo ka gaabsaday magaciisa ayaa u sheegay wargeyska afka dheer ee Washington Post in "wax walba ay u socdaan jihada qaldan."
Madaxweyne Joe Biden ayaa sheegay inuusan ka qoomameynin go'aanka ah in ciidamada Mareykanka laga saaro dalka, isagoo carrabka ku adkeeyay in ciidamada Afghanistan ay tahay inay "u dagaallamaan qarankooda".
"Fiiri, waxaan ku bixinnay in ka badan tirilyan oo doollar 20 sano," ayuu Biden ka sheegay shir jaraa'id Talaadadii. "Waxaan tababarnay kuna qalabaynay qalab casri ah in ka badan 300,000 oo ciidamada Afgaanistaan ah".
Wuxuu raaciyey: "Hoggaamiyeyaasha Afgaanistaanna waa inay isu yimaadaan. Waxaan luminay kumanaan - waxaan oo aan ku waynay dhimasho iyo dhaawac - kumanaan askar Mareykan ah".
Qiimaynta ah in Kabul ay si dhakhso ah ugu dhici karto gacanta Taalibaan ayaa sii kordhineysa walaaca. Qiimeyn hore oo sirdoon bishii June - oo ay daaha ka qaadeen dhowr warbaahin oo Mareykan ah - ayaa ka digtay in caasimadda Afgaanistaan laga yaabo in kooxda ay qabsato lix bilood gudahood.
Isbaheysi caalami ah oo uu horkacayo Mareykanka ayaa ku duulay Afgaanistaan 2001-dii iyagoo ka jawaabaya weeraradii 9/11 ee New York iyo Washington. Kooxda Taalibaan oo xilligaas gacanta ku haysay magaalada Kabul ayaa la sheegay in ay gabaad-siisay Osama Bin Laden oo ahaa hoggaamiyaha Al-Qaacida.
GAROWE ONLINE
