Toogasho khasaaro geystay oo ka dhacdey Mareykanka

WASHINGTON, USA – Ugu yaraan siddeed qof, oo ay ku jiraan lix haween Aasiyaan ah, ayaa lagu dilay toogasho ka dhacday seddex goobood oo kala duwan oo ku yaal gobolka Georgia ee Maraykanka Talaadadii, iyada oo nin 21 jir ah oo caddaan ah uu ku jiro xabsiga loogana shakisan yahay inuu abaabulay dhammaan saddexda weerar, sidda uu sheegay booliska.

Toogashada ayaa timid iyaddoo dad badan oo Aasiyaan Mareykan ah ay wajahayaan cabsi ka dib markii ay dhawaanahan ay ku bateen dambiyada nacaybka iyo beegsiga goobahooda ganacsiga.

"Afar ka mid ah dadka la dilay ayaa lagu toogtey agagaarka Acworth, oo ah xaafad ka tirsan caasimadda gobolka Georgia ee Atlanta," sidaana waxa wariyey wargayska Atlanta Journal-Constitution.

Kabtan Jay Baker oo ka tirsan xafiiska booliska maxaliga ee degmada Cherokee County ayaa u sheegay wargayska in dadka la dilay ay kala ahaayeen laba haween Aasiya ah, haweenay cadaan ah iyo nin cadaan ah, halka nin kale oo kasoo jeeda bulshada Hispanic uu dhaawacmay.

Waaxda booliiska Atlanta ayaa xaqiijisay in afar haween ah laga helay meydadkooda labo goobo ganacsi oo ku yaal waqooyiga-bari ee Atlanta, kuwaas oo loo aqoonsaday Gold Massage Spa iyo Aroma Therapy Spa.

Booliska ayaa u sheegay Atlanta Journal-Constitution in dhamaan afarta qof ee Atlanta wax ku noqday ay ahaayeen haween Aasiya ah. Baker ma uusan sheegin haddii baarayaasha ay tuhmayaan in Aasiyaanka Ameerikaanka ah si gaar ah loo bartilmaameedsaday.

"Waxba meesha lagama saari doono," ayuu yiri. “Waxaan ku wadnaa dilka baaritaan badan. Marka meel kasta oo ay caddayntu noo horseeddo, waa halka ay baarayaashu tagayaan". Masuuliyiintu waxay cadeeyeen Robert Aaron Long inuu yahay tuhmane loo haysto dhamaan seddexdii toogasho isla markaana uu haatan wajahayo su’aallo waydiin iyo baaritaan.

GAROWE ONLINE