Trump: NATO Waxay Wajihi Doontaa Mustaqbal Adag Haddii Marinka Hormuz La Furi Waayo

Warbixin uu daabacay Financial Times ayaa muujisay in Madaxweynaha Mareykanka Donald Trump uu fariin adag u diray xulafada reer Galbeedka, isagoo ka digay mustaqbalka iskaashiga NATO haddii aysan ka qayb qaadan dadaallada lagu furayo Strait of Hormuz, marinka muhiimka u ah gaadiidka shidaalka caalamka.

Trump ayaa sheegay in dalalka ka faa’iideysta marinkan — gaar ahaan Yurub iyo Aasiya — ay mas’uuliyad ka saaran tahay sugidda ammaankiisa. Wuxuu tilmaamay in Mareykanku aanu si weyn ugu tiirsanayn shidaalka ka yimaada Gacanka Carabta, halka dalal kale ay aad ugu tiirsan yihiin, sidaa darteedna ay tahay inay qayb ka noqdaan ilaalinta marinka.

Isagoo ka hadlayay xulafada, Trump wuxuu muujiyay niyad jab gaar ahaan ku saabsan jawaabta United Kingdom. Wuxuu sheegay inuu horay ula hadlay Ra’iisul Wasaaraha Britain Keir Starmer, balse London aysan diyaar u ahayn inay si degdeg ah uga qayb qaadato hawlgallada badda. Trump wuxuu yiri markii uu codsaday taageero, Britain aysan diyaar u ahayn, balse markii xaaladdu is beddeshay ay soo jeediyeen inay diraan laba markab oo dagaal, isagoo ku dooday in taageerada loo baahan yahay “ka hor guusha, ee aan ka dib.”

Madaxweynaha Mareykanka wuxuu sidoo kale sheegay in ciidamada Mareykanka iyo Israel ay si weyn u wiiqeen awooddii milatari ee Iran labadii toddobaad ee la soo dhaafay. Sida uu sheegay, Iran hadda awood badan uma laha badda, hawada iyo difaaca cirka, balse ay weli awood u yeelan karto inay khalkhal ku abuurto marinka Hormuz iyadoo adeegsanaysa miinooyin badeed ama weerarro yar yar.

Dhanka kale, dagaalka ayaa horey u saameeyay xulafada Yurub. Askari Faransiis ah ayaa lagu dilay weerar drone oo Iran ka fulisay Ciraaq, halka diyaarad Talyaani ah lagu burburiyay saldhig ku yaalla Kuwait.

Trump ayaa sidoo kale ka digay in Mareykanku uu qaadi karo weerarro cusub oo ka dhan ah Kharg Island, oo ah xarunta ugu weyn ee Iran ka dhoofiso shidaalka. Wuxuu sheegay in haddii loo baahdo, Mareykanku awood u leeyahay inuu bartilmaameedsado kaabeyaasha shidaalka Iran waqti aad u kooban gudaheed.

Markii wax laga weydiiyay suurtagalnimada in Russia ay Iran siiso xogta dayax-gacmeedyada si ay u beegsato difaacyada Mareykanka iyo Israel, Trump wuxuu sheegay inuusan hubin. Si kastaba, wuxuu xusay in Mareykanku horey u taageeray Ukraine dagaalka ay kula jirto Russia, isagoo tilmaamay in maamulkii hore ee Joe Biden uu Ukraine siiyay taageero ballaaran oo dhaqaale iyo militari.

GAROWE ONLINE