Trump oo shaaciyey shaqsiga uu la doonayo jagada ra'iisul wasaaraha UK

LONDON, UK – Madaxweynaha Mareykanka ayaa cadeeyay mowqifkiisa ku aadan shaqsiga uu doonayo in uu dhaxlo xilka ra’iisul wasaaraha Ingiriiska.

Theresa May ayaa jagadan banaaneysa todobaadka soo aadan, waxaana isa soo taraya murashaxiinta u han-qaltaageysa.

Ninka ugu cad-cad illaa iyo haatan waa Boris Johnson, kaasoo qudhiisa wajahaya maxkamaddeyn dharbaaxo ku noqon karta hamigiisa.

Isaga oo u waramayey THE SUN, ayuu Trump tibaaxay in Johnson uu noqon doono dookh wanaagsan hadii loo xushay hogaamiyaha xisbiga muxaafadka.

Trump oo sii hadlaya ayaa wuxuu daba dhigay: "Aniga waxaan rumeysan nahay in hadii Boris uu qabto uu shaqo fiican qaban doono.

Hogaamiyaha dalka ugu dhaqaalaha badan caalamka ayaa wuxuu hadalkiisa intaasi raaciyey: "Aniga qof walba waan caawin doonaa".

Hadaladaan kasoo yeeray Donald Trump ayaa waxay kusoo beegmayaa xili la filayo in uu socdaal ku yimaado UK isbuucyadda soo aadan.

GAROWE ONLINE