Ugu yaraan 9 Qof oo Lagu Dilay Weerar Hubeysan oo Ka Dhacay Dugsi Sare Dalka Canada

Ugu yaraan sagaal qof ayaa ku dhintay, 25 kalena way ku dhaawacmeen kadib weerar hubeysan oo Talaadadii ka dhacay dugsi sare iyo guri ku yaalla magaalada yar ee Tumbler Ridge, gobolka British Columbia ee dalka Canada, sida ay sheegeen ciidamada Booliiska Federaalka ee loo yaqaan Royal Canadian Mounted Police (RCMP).

Booliiska ayaa sheegay in marka ay goobta gaareen abaaro 1:20 duhurnimo waqtiga maxalliga ah, ay gudaha dugsiga ka heleen lix qof oo meyd ah, halka qof kale uu u dhintay dhaawacii soo gaaray intii isbitaalka loo sii waday. Laba qof oo kale ayaa sidoo kale meydkooda laga helay guri ku yaalla isla deegaanka, kaas oo la rumeysan yahay inuu xiriir la lahaa weerarka ka dhacay dugsiga.

Saraakiisha ammaanka ayaa sheegay in qofkii loo maleynayay inuu falka geystay isna laga helay gudaha dugsiga isagoo dhintay, dhaawaca soo gaarayna uu u muuqday mid uu isagu is-geystay.

Taliyaha Booliiska ee Waqooyiga British Columbia, Ken Floyd, ayaa warbaahinta u sheegay in wali aan la ogaan sababta rasmiga ah ee ka dambeysay weerarka, isla markaana aan la shaacin faahfaahin dheeraad ah oo ku saabsan qofka weerarka fuliyay, marka laga reebo in uu ahaa isla shakhsigii digniinta hore loogu diray bulshada, laguna sifeeyay haweeney timo bunni ah leh oo xirneyd dhar furan.

Booliisku waxay sheegeen in dhaawacyada kale intooda badan aan loo arkin kuwo nafta halis gelinaya, iyagoo weli wada wacyigelin iyo la xiriiridda qoysaska dhibbanayaasha.

Ra’iisul Wasaaraha British Columbia, David Eby, ayaa sheegay in khatartii amni ee bulshada ay dhammaatay, kadib howlgal ballaaran oo ay fuliyeen ciidamada ammaanka. Sidoo kale amar ahaa in dadku guryahooda ku nagaadaan ayaa la soo rogay saacado kadib markii weerarka la soo sheegay, balse waxaa la qaaday fiidkii isla maalintaas.

Wasiirka Amniga Dadweynaha ee gobolka, Nina Krieger, ayaa ku tilmaantay dhacdadan mid ka mid ah weerarradii ugu xumaa ee toogasho wadareed ah ee abid ka dhaca gobolka iyo guud ahaan dalka Canada.

Maamulka waxbarashada deegaanka ayaa ku dhawaaqay in la xirayo Toddobaadkan intiisa kale Dugsiga Sare ee Tumbler Ridge iyo Dugsiga Hoose ee isla magaalada, halka sidoo kale Kulliyadda Northern Lights College — oo xarun ku leh dugsiga sare — ay iyana albaabada u laabtay sababo la xiriira amniga iyo xaaladda murugada leh ee ka dhalatay weerarka.

GAROWE ONLINE