Wadahadalo toos ah oo u bilowday Sacuudiga iyo Iiraan

TEHRAN, Iran – Saraakiisha sar-sare ee Sacuudiga iyo Iiraan ayaa wadahadalo toos ah ka yeeshay sidii loo hagaajin lahaa xiriirka u dhaxeeya labada dal ee xifaaltanka ka dhaxeeyo, sida lagu sheegay warbixin lagu daabacay wargeyska Financial Times oo soo xiganaysa mas'uuliyiin ka warbixiyey qadiyadaha laga wada hadlay.

Wareegii koowaad ee wadahadallada oo qabsoomay hal sano kadib markii joojiyeen xiriirkooda diblomaasiyadeed ayaa ka dhacay Baqdaad 9-kii Abriil waxaana doodaha miiska lagu gorfeeyay kamid ahaa weerarrada Xuutiyiinta ku beegsanayaan xarumaha muhiimka u ah boqortooyada Sacuudi Carabiya.

Sarkaalka aan la magacaabin oo lagu soo xigtay warbixinta ayaa xusay in wafdiga Sacuudiga uu hogaaminayo Khalid bin Ali al-Humaidan, oo ah madaxa sirdoonka boqortooyada, sidoo kale waxaa loo balamay wareeg kale oo wadahadal ah.

Ma jiro wax hadalo ah oo ka soo baxay labada dhinac ka dib daabacaadda warbixinta. Majaladda FT ayaa sidoo kale waxay intaas ku dartey in sarkaal sare oo Sacuudiyaan ah uu beeniyay in wax wadahadal ah aysan la gelin dhigooda Iran.

Telefishanka Al-Mayadeen ee u ololeeya Lubnaan iyo wakaaladda wararka ee Unews waxay Axaddii labaduba soo xigteen ilo Iiraani ah oo diidaya wadahadalka Sacuudiga.

Toddobaadyadii la soo dhaafay, dagaalameyaasha Xuuthiyiinta ayaa kordhiyay weerarada gantaalaha iyo diyaaradaha aan duuliyaha laheyn, iyagoo inta badan bartilmaameedsada xarumaha saliida Sacuudiga iyo goobaha militariga ee guud ahaan boqortooyada, iyagoo daaha ka rogay in ay jawaab u yihiin duqeymaha cirka ah ee Sacuudiga ka wado Yemen.

Sacuudi Carabiya ayaa ku eedeysay Iiraan inay hub u gudbiso Xuutiyiinta, kuwaas oo gacanta ku haya caasimada Yemen ee Sanca ilaa sanadkii 2015. Warkan ayaa imanaya iyada oo Mareykanka iyo Iiraan ay isku dayayaan in ay soo nooleeyaan heshiiskii Nuclearka ee sanadkii 2015 kaas oo Sucuudigu uu si adag uga hor-yimid.

GAROWE ONLINE