Wadaxaajoodkii ku aadanaa biyo-xireenka Itoobiya oo guuldarro ku soo idlaaday
-
GAROWE ONLINE XAFIISKA MUQDISHO
- Posted On 25-09-2023, 06:38PM
ADDIS ABABA, Itoobiya - Itoobiya ayaa dhaleeceyn u jeedisay Masar, kadib markii uu fashil ku soo idlaaday shirkii saddex geesoodka ahaa ee ku saabsanaa biyo-xireenka “Renaissance” kaas oo lagu qabtay Addis Ababa.
Itoobiya ayaa marti galisay wareegii labaad ee wada xaajoodka saddex geesoodka ah ee u dhexeeya Itoobiya, Suudaan iyo Masar intii u dhaxaysay Sebtembar 23 ilaa 24, 2023. Wareegga wadahadalka ayaa bilaabmay ujeeddadiisuna ahayd in horumar laga gaaro, laguna soo afjaro kala duwanaanshaha arrimaha taagan.
Sida laga soo xigtay war-murtiyeedka Itoobiya, dhinaca Masar ayaa riixay mawqif wax u dhimaya ku dhawaaqistii mabaadii'da ee ay labada dhinac kala saxeexdeen 2015, wada-xaajoodyaduna ma horseedin horumar la taaban karo oo laga gaaro arrinta biyo-xireenka.
Dhinacyada shirka ayaa isku raacay in la sii wado wada-xaajoodyada saddex geesoodka ah bisha Oktoobar 2023, laguna qabto caasimadda Masar Qaahira.
GAROWE ONLINE
