Wasiirkii ugu horeeyay ee Yahuud ah oo geeray Imaaraadka
-
WARIYAHA CAALAMKA GAROWE ONLINE
- Posted On 29-06-2021, 10:47AM
ABU DHABI, UAE - Yair Lapid ayaa noqdey wasiirkii ugu horeeyay Yahuud ah oo taariikhda booqda Imaaraadka Carabta, mid kamid ah wadamada Carabta ee fekerka Donald Trump cilaaqaad kula bilaabay Tel Aviv.
Lapid, oo ah xoghayaha arrimaha dibadda Israel, wuxuu wadahadalo la leeyahay dhigiisa Abdullah bin Zayed Al Nahyan kaasoo mudada laba casho ee dalkaas uu ku sugan yahay ay kawada arrin-sanayaan xiriirka laba geesoodka ah, iskaashiga dhanka dhaqaalaha, ammaanka iyo ganacsiga.
"Daahfurkan waa fal astaan ah," ayuu afhayeenka wasaaradda arrimaha dibedda Yahuuda Lior Haiat u sheegay Al Jazeera. "Safaaradda iyo qunsuliyada waxay ku shaqo bilaabayaan afar bilood iyo bar."
Israel ayaa caadi ka dhigtay xiriirkii ay la lahayd Imaaraadka iyo Baxrayn bishii Ogos ee la soo dhaafey, waxaana daahfurtay dowladdii ra’iisul wasaarihii hore ee Israa’iil Benjamin Netanyahu, oo 12-kii sano ee uu xukunka hayey ay dhammaatay horaantii bishaan.
Xiriirka laba geesoodka ah ee u dhexeeya Israel iyo Imaaraadka ayaa wajahay tijaabo hore bishii May markii Israel ay duqeysay Marinka Gaza muddo 11 maalmood ah, halkaas oo ay ku dhinteen ugu yaraan 256 Falastiiniyiin ah oo ay ku jiraan 66 carruur ah, iyo Hamas ayaa kumanaan gantaal ku soo riday Israa’iil, halkaas oo ay ku dhinteen 13.
In kasta oo Imaaraadku ku dhaleeceeyay Israa’iil duqeynta iyo barakicinta qasabka ahayd ee Falastiiniyiinta looga saaray xaafadda Sheekh Jarraax ee bariga Qudus ayna wehlisay beegsiga iyo duulaanka ka dhanka ah dhismaha Masaajidka Al-Aqsa, Abu Dhabi ma burin mowqifkeeda la xiriira aamusanta ee ku saabsan weerarkii Israa’iil ay ku qaadday Qaza.
Amniga ayay u badan tahay in uu qeyb ka yahay ajandeyaasha ugu sareeya ee wadahadaladda uu Lapid la geli doono mas'uuliyiinta Imaaraadka gaar ahaan qadiyadda la xiriirta Iiraan.
Booqashadiisa Imaaraadka ayaa timid iyadoo ay socdaan dadaallo uu waddo maamulka Joe Biden si loo soo nooleeyo Qorshaha heshiiskii nukliyeerka Iran ee 2015 kaasoo ay qalinka kuwada duugeen quwadaha aduunka.
GAROWE ONLINE
