Weerar ka dhacay xeyndaanbka baarlamaanka Mareykanka

WASHINGTON, USA – Weerar ka dhacay nawaaxiga dhismaha Capitol-ka Mareykanka ee ku yaal Washington DC ayaa waxaa ku dhintay hal sarkaal oo booliis ah halka mid kalena uu ku jiro isbitaalka oo waa dhaawacay.

Gaari ayaa ku dhacay xayndaabka amniga ka hor inta uusan darawalku u jixin-jixin askarta isagoo mindi wata, sidda uu sheegay taliska booliska.

Saraakiishii waxay ku fureen rasaas la tuhunsanaha kaasoo ay haleeleen xabadaha ilaaladda dhismaha Baarlamaanka waddanka Mareykanka.

Masuuliyiintu waxay sheegeen in weerarka, oo yimid seddex bilood kadib rabshadihii dadka badan ku dhinteen ee ka dhacay Capitol bishii Janaayo, uusan u muuqan mid xiriir la leh ay ay geysteen kooxo argagixiso ah.

Robert Contee, oo ah kusimaha taliyaha Waaxda Booliska Magaalada Washington DC, ayaa shirkiisa jaraa'id ku sheegay "Weerarku ha ahaado mid ku saabsan sharci fulinta, ama cidkasta, waxaan leenahay masuuliyad in aan salka u dhigno waana sameyn doonaa taas".

Ku simaha Taliyaha Booliska Capitol, Yogananda Pittman, ayaa dhankiisa wuxuu yiri "aniga oo qalbi ahaan aad u tiiraayeysan ayaan ku dhaawaaqayaa in mid kamid ah saraakiisha bileyska uu u geeriyoodey dhaawac soo gaarey".

War-saxaafadeed dambe oo ay soo saartey ayay magaca sarkaalka waxay ku sheegtay William "Billy" Evans, oo xubin ka ahaa booliska Capitol muddo 18 sano ah kana mid ahaa ilaaladda qeybta hore ee dhismaha Capitol-ka.

"Fadlan u ducey William isaga iyo qoyskiisa," ayay tiri. Soo saaraha CNN Kristin Wilson ayaa William wuxuu ku tilmaamay "qofka aad u naxariis badan".

Xaaladda Capitol Hill ayaa kacsanayd seddexdii bilood ee la soo dhaafay. Tan iyo rabshadihii 6dii Janaayo, dhismuhu wuxuu u ekaa sidii qalcad adag oo silig lagu wareejiyay, xayndaab bir ah iyo nabadgelyadda oo si weyn loo adkeeyay.

GAROWE ONLINE