Xuuthiyiinta oo Sii Xoojinaya Weerarada ay Ku Hayaan Maraakiibta

Xuuthiyiinta dalka Yemen ayaa mar kale ku dhowaaqay inay sii wadi doonaan weeraradooda ay ku joojinayaan dagaalka Israel ee ka dhanka ah Gaza, kadib markii Mareykanka iyo UK ay bilaabeen tobanaan duqeymo ah habeenimadii Sabtida.

Duqeymahan ugu dambeeyay, oo ay taageereen lix dal oo kale, ayaa yimid maalin kadib markii Mareykanka uu sheegay inuu duqeeyay tobanaan goobood oo ay ku sugnaayeen kooxo hubeysan oo ku yaalla Ciraaq iyo Suuriya, kuwaasoo Washington ay sheegtay in Iran ay taageerto.

Xuuthiyiintu waxay markii hore weerar ku qaadeen kaliya maraakiibta xiriirka la leh Israel ee Badda Cas iyagoo taageero u muujinaya Falastiiniyiinta, hase yeeshee waxay ballaariyeen weeraradooda si ay ugu daraan maraakiibta Mareykanka iyo UK kadib markii Washington iyo London ay duqeymo ka fuliyeen Yemen.

Bartilmaamredyada Xuuthiyiinta ee La Beegsaday. 

Mareykanka iyo UK ayaa Sabtidii, 3-da Febraayo, duqeymo xoogan ka fuliyay aagag ay maamulaan Xuuthiyiinta ee Yemen. Taliska Dhexe ee Mareykanka (CENTCOM) ayaa sheegay inay ku beegsadeen gantaal ka hortag ah oo Xuuthiyiintu ku lahaayeen Badda Cas maalintii Axadda, weerar gaar ah.

Mareykanka iyo UK waxay sheegeen inay bartilmaameedsadeen 36 goobood oo Xuuthiyiin ah Yemen gudaheeda, halka afhayeenka militariga Xuuthiyiinta, Yahya Saree, uu sheegay in caasimadda Sanaa ay ka mid ahayd meelaha la duqeeyay Sabtidii. Illaa hadda lama soo sheegin wax khasaare nafeed ah.

Bartilmaameedyada waxaa ka mid ahaa bakhaaro dhulka hoostiisa ah, xarumaha taliska iyo kontaroolka, nidaamyada gantaallada, kaydka iyo goobaha hawlgallada diyaaradaha aan duuliyaha lahayn, raadaarrada, iyo helikobtarada, sida uu sheegay CENTCOM.

Milatariga Mareykanka ayaa sheegay inay ku dhufteen 36 bartilmaameed oo Xuuthiyiin ah 13 goobood, hase ahaatee, sida duqeymo badan oo hore oo Yemen ka dhacay tan iyo bilowgii dagaalka Gaza, waxay ka gaabsadeen inay faahfaahin dheeraad ah bixiyaan. Tani waxay ahayd hawlgalkii saddexaad ee wadajir ah oo ka dhan ah Xuuthiyiinta muddo laba toddobaad gudahood ah.
Mareykanka ayaa sidoo kale ku dhawaaqay inuu duqeeyay dhowr gantaal oo nooca ka hortagga maraakiibta ah, kuwaas oo uu sheegay inay khatar ku yihiin maraakiibta milatariga iyo kuwa ganacsiga ee mara biyaha u dhow Yemen.

Milatariga kooxda Yemen, sidoo kale loo yaqaan Ansarallah, ayaa sheegay in lagu bartilmaameedsaday 48 weerar oo ka dhacay gobollo dhowr ah, oo ay ku jiraan 13 weerar oo ka dhacay Sanaa iyo nawaaxigeeda, 11 Taiz, 9 Hodeidah, 7 al-Bayda, 7 Hajjah, iyo mid Saada. Waxay sheegeen inaanay jirin wax khasaare nafeed ah oo soo gaaray.

GO +AG