Xuutiyiinta Yemen oo Sacuudiga ku soo rogay xayiraad dhinaca badda ah 

SANAA, Luulyo 20 – Kooxda Xuutiyiinta Yemen ee taageerada ka hesha Iiraan ayaa ku dhawaaqday inay xayiraad dhinaca badda ah ku soo rogeen Sacuudi Carabiya, kaddib markii toddobaadkii hore ay labada dhinac markii ugu horreysay sannado badan isweydaarsadeen weerarro.

Afhayeenka militariga Xuutiyiinta, Yahya Saree, ayaa sheegay in go’aanka xayiraadda uu dhaqan galay isla markiiba, isagoo ku hanjabay in la bartilmaameedsan doono maraakiibta uu sheegay inay xiriir la leeyihiin Sacuudiga.

Saree ayaa sheegay in tallaabadan ay tahay jawaab ay kooxdu uga falcelinayso waxa ay ku tilmaantay weerarro iyo tallaabooyin ay qaadeen ciidamada Sacuudiga, isagoo ku eedeeyay Riyadh inay dib u furtay colaadda ka dhanka ah Yemen.

Wuxuu ku eedeeyay Sacuudiga inay 12 sano go'doomin ku hayeen Dekadaha iyo Garoomada diyaaradaha dalka Yemen, taasoo abuurtay xaalad bini'aadanimo iyo faqri baahsan.

Xuutiyiinta ma aysan bixin faahfaahin ku saabsan sida ay u fulin doonaan xayiraadda badda ama nooca maraakiibta ay beegsan doonaan, balse tallaabadan ayaa sare u qaadaysa walaaca laga qabo amniga maraakiibta ganacsiga ee mara biyaha gobolka.

Xiisaddan cusub ayaa timid kaddib markii Xuutiyiinta iyo Sacuudiga ay toddobaadkii hore isku dhaceen, taasoo noqotay iska horimaadkii ugu weynaa ee labada dhinac dhex mara tan iyo markii uu hoos u dhacay dagaalkii tooska ahaa ee u dhexeeyay.

Sacuudi Carabiya ayaa muddo dheer hoggaaminaysay isbahaysi militari oo taageerayay dowladda Yemen ee caalamku aqoonsan yahay, halka Xuutiyiintu ay gacanta ku hayaan qaybo badan oo waqooyiga Yemen ah, oo ay ku jirto caasimadda Sanaa.

Labada dhinac ayaa sannadihii lasoo dhaafay sameeyay dadaallo diblomaasiyadeed oo lagu yareynayo colaadda, gaar ahaan kaddib xabbad-joojin aan rasmi ahayn oo dejisay dagaalladii waaweynaa.

Si kastaba, ku dhawaaqista xayiraadda badda ayaa dib u kicin karta xiisadaha gobolka, gaar ahaan agagaarka Bab al-Mandab, oo ah marin-biyood istiraatiiji ah oo isku xira Badda Cas iyo Gacanka Cadmeed, isla markaana ay maraan qayb muhiim ah oo ka mid ah ganacsiga caalamiga ah.

Xuutiyiinta ayaa horey u bartilmaameedsaday maraakiib ku sugan Badda Cas, iyagoo sheegay inay tallaabooyinkaas ku taageerayaan Falastiiniyiinta Gaza, inkastoo weerarradaas ay saameeyeen maraakiib ganacsi oo caalami ah.

Xaaladda cusub ayaa laga cabsi qabaa inay saameyn ku yeelato amniga maraakiibta, qiimaha gaadiidka badda iyo ganacsiga caalamiga ah haddii xiisaddu sii kororto.

GAROWE ONLINE