Al-Shabaab oo beenisay inuu "geeryooday" hogaamiyaheeda
-
Wariyaha Muqdisho Garowe Online
- Posted On 27-06-2018, 01:22PM
MUQDISHO, Soomaaliya - Iyadoo si wayn leysla dhex-marayey saacadihii udambeeyay inuu geeryooday Hogamiyaha Al-Shabaab, Axmed Diiriye oo loo yaqaan Abu Cubeyda, ayaa waxaa beenisay Kooxdaan.
Abuu Cubeyda ayaa wuxuu kala wareegay xilka ugu sareeya Shabaab, hogaamiyihii la khaarijiyay ee Axmed Cabdi Godane sanadkii 2014-tii, kaasoo lagu dilay duqayn dhanka Cirka ah.
Sarkaal ka tirsan dowladda Soomaaliya oo la hadlay warbaahinta ku hadasha afka ciidamada xooga dalka, ayaa sheegay inuu xanuun dhanka Kilyaha ah uu udhintay Ninka ugu sareeya Shabaab.
Balse, Bayaan ay kooxda kasoo saartay wararkaan leysla dhex-marayay ayaa waxay kaloo ku beenisay in Abuu Cubeyda uu sidoo kale ku jiro xaalad liidata oo dhanka Nolasha ama caafimaadkiisa.
Waxay ku tilmaamtay kooxda wararkaas, "kuwa aan lahayn sal iyo baar, iyagoona ku adkeysatay in hogaamiyaheeda Abuu Cubeyda uu nool yahay, islamarkaana uu caafimaad qabo".
Waa markii ugu horeysay oo ay Kooxda Al-Shabaab kasoo jawaabto warar ay baahiyeen warbaahinta ku hadasha afka dowladda, iyo sarkaal ka tirsan dowladda Soomaaliya oo ku saabsan iyaga.
GAROWE ONLINE
