Axmed Madoobe oo ka walaacsan xiriirka liita ee DF iyo maamulada

KISMAAYO, Jubaland - Madaxweyne Axmed Maxamed Islaam oo gudoomiyay shirka Golaha Wasiirada Jubaland ayaa walaac ka muujiyey xiriirka liita ee dowladda iyo maamulada.

Shirka oo todobaadle ah kana soo qeybgaleen wasiirada badankooda ayaa ku qabsoomay Kismaayo, oo ah magaalo madaxda ku meel gaarka ah ee dowlad goboleedkaas.

Ugu horeyn, Axmed Madoobe oo ka hadlay kulanka ayaa dulmar ku sameeyay xaalada guud ee dalka si gaar ah amniga, siyaasadda iyo doorashooyinka soo aadan.

Sidda lagu sheegay qoraal kasoo baxay golaha, madaxweynuhu wuxuu sheegay in wada shaqayn la'aanta dowladda iyo maamulada ay saameysay amniga iyo doorashooyinka.

Hanaanka doorashooyinka ayuu ku nuux-nuux saday in ilaa hadda aan wax hormar ah laga samaynin, isagoo xukuumada federaalka ku eedeeyay in ay isku koobtay talada.

Doorashooyinka Soomaaliya ee 2020 ayuu qorshuhu ahaa in ay noqdaan qof iyo cod, balse waxaa laga muujinayaan shaki kadib markii la ansixiyey "sharci aan loo dhameyn".

Dhinaca kale, Gudiga dakhliga ee Jubaland ayaa laga dhagaystay warbixin la xiriirta xaalada dhaqaalaha iyo sidii loo dardar galin lahaa.

Madaxweyne Axmed Madoobe ayaa kadib warbixinta wuxuu faray in hanaanka canshuuraha iyo dakhli abuurida la xoojiyo sanadkan bilowga ah.

Wasaarada Xanaanada ayaa waxay soo bandhigtay warbixin ku saabsan shir looga hadlay hanaanka talaalka xoolaha iyo sidii loogu mari lahaa qaab lagula socdo caafimaadkooda.

GAROWE ONLINE