CC Shakuur oo culimada ugu baaqay in aysan la kala safan siyaasiyiinta

MUQDISHO, Soomaaliya - Siyaasi Cabdiraxmaan Cabdishakuur Warsame ayaa soo gabagabeeyay hadalheyntii ka dhalatay khudbadii uu ka jeediyey Jarmalka ee qabsatay baraha bulshadda.

Hogaamiyaha xisbiga Wadajir ayaa u mahadceliyey culimada "sida nasteexada leh" uga falcelisey "khaladkii ku jiray" khubadiisa, isaga oo cafiyey wadaadada "gaarey sharafkiisa iyo Diintiisa".

"Waxaan kaloo rabaa in aan u mahadceliyo dadka Soomaaliyeed ee u arkey dulmi aniga la ii geysanaayo ama leygu beegsanaayo ama mid lasoo abaabulay oo aan ahayn khaladkii ku jiray khudbada".

Wasiirkii hore ee Qorsheynta Soomaaliya ayaa si shaacbaxsan ugu dhawaaqay in uu EBBE waydiisanayo in uu ka cafiyo "khaladaadkii ku jiray" hadal-jeedintiisa.

Warsame ayaa sheegay in uu mar walba u taagan yahay "ilaalinta" doorka uu Islaamka siiyey haweenka, kaas oo uu caddeeyay in dhaqanka Soomaaliyeed uu siinayo "kaalin guracan".

Erayada uu siyaasigaan jeediyey ee dooda dhaliyey ayaa ahaa in culimada ay "xadiis faalse ah jeebka kala soo baxaan marka ay xaqirayaan doorka haweenka ee siyaasadda iyo bulshadda".

Ugu dambeyntii, Cabdiraxmaan Cabdishakuur Warsame oo gabagabadda muuqaal dhowr daqiiqo soconaya oo laga soo duubay ayaa ku waaniyey culimadda in aysan la kala safan siyaasiyiinta.

HOOS KA DAAWO MUUQAALKA

GAROWE ONLINE