Ra'isal wasaaraha Somalia oo Baladwayne tagay
-
- Posted On 22-03-2016, 08:54PM
BALADWEYNE- Ra'iisul wasaraha xukuumadda Federaalka Somalia Cumar Cabdirashiid Cali Sharmaarke iyo wafdi uu hoggaaminayo oo isugu jira xubnaha labada golle dawladda ayaa maanta gaaray magaalada Baladwayne ee xarunta gobolka Hiiraan.
Wafdigan, ayaa soo dhaweyn diiran loogu sameeyay magalada, waxaana qaabilay wasiirka Arrimaha Gudaha, masuuliyiin ka tirsan maamulka Gobolka Hiiraan, Odayaasha dhaqanka, Saraakiisha Ciidamadda Dawladda iyo kuwa Midowga Africa ee AMISOM.
Cumar Cabdirashiid ayaa halkaas u tagay inuu wada-hadal la yeesho qaar ka mid ah beelaha dega gobolka Hiiraan si loo guda galo dhismaha Maamulka gobollada Hiiraan iyo Shabellaha dhexe, waxana inta uu joogo kulamo kala duwan la qaadan doonaa Odayaasha dhaqanka iyo qeybaha kala duwan ee Bulshada Degmada Beledwayne si looga gudbo tabashada ay qabaan dadka deegaanku.
Ra’iisul Wasaare Cumar ayaa u mahadceliyey shacabka gobolka sida diiran ee ay ugu soo dhaweeyeen Beledwayne, wuxuna sheegay inta uu joogo g in uu la kulmi doono dhinacyada Siyaasadda, Dhaqanka iyo cid walba oo jecel nabadda iyo horumarka deegaanka.
Arrintan ayaa timi xilli uu dhawaan soo garay wasiirka Arrimaha Gudaha iyo Wafdi la socda, waxayna wadaan qorshe dadka deegaanka looga dhaadhicinayo in wax laga qabto khilaafaadka ka dhashay shirka maamul u samaynta labada gobolka, kaasi oo Odoyaasha Hiiraan saluug ka muujiyeen qaabka loo qaybiyay shir guddoonka iyo waliba arrimo kale.
Dowladda Federalka ayaa dadaal ugu jirta sidii maamulkaasi loo dhisi lahaa, si uu qayb uga noqon lahaa maamul goboleedyada ka qayb galaya doorashada 2016.
GAROWEONLINE
