Dad ku dhintay qarax ka dhacay magalada Muqdishu
-
- Posted On 02-01-2016, 10:05AM
02 December, 2015(GO)-Wararka ka imaanaya magalada Muqdishu xarunta Somalia ayaa sheegaya inay dhinteen labo ruux kadib weerar lagu qaaday maqaaxida the Village agagaarka guriga hooyooyinka magalada Xamar.
Shakhsi la tuhunsanyahay inuu katirsanyahay ururka Al-Shabaab oo isku soo xiray walxaha qarxa ayaa isku miidaamiyay meheradda oo la sheegay inay fadhiyeen Wariyaal iyo saraakiil katirsan dowladda, waxaana shakhsiyaad weerarka ka bad baaday shaaciyeen inay ka baxsadeen goobta kadib markii ay ka shakiyeen ruuxa isqaxiyay.
Labada qof ee dhintay waxaa ku jira ruuxa ismiidaamiyay, waxaana warar kala duwan kasoo baxayaan dadka ku dhaawacmay, iyadoo saraakiisha amniga sheegayaan dhawaca labo ruux, halka warar madax banaan tibaaxayaan dhaawaca Afar qof.
Bur-bur xooggan ayaa soo gaaray goobta la weeraray, waxayna noqonaysaa markii saddexaad oo ururka Al-Shabaab beegsadaan the Village.
Majirto cid sheegatay weerarka maanta, balse dowladda iyo shacab ka agdhawaa goobta ayaa ku tuhmaya qofka gaystay weerarka inuu xiriir la leeyahay Shabaab.
Ciidamo katirsan kuwa amniga Muqdishu ayaa tagay goobta, waxaana socda baaritaanno ku aaddan qaabka wax u dhaceen.
GAROWEONLINE
