Soomaaliya: Dib u dhac ku yimid dhageysiga Dacwada CC Shakuur
-
Wariyaha Muqdisho Garowe Online
- Posted On 27-12-2017, 02:30PM
MUQDISHO, Soomaaliya - Cabdiraxmaan Cabdishakuur Warsame ayaa shaaciyay inuu wakiilnaminadii kala noqday saddex qareen oo u doodayay, isaga oo sharci darro ku tilmaamay dacwadda loo haysto.
Qareenada oo kala ah Tahliil Xaaji Axmed, Cabdikariim Maxamed Axmed iyo Amina Xaaji Axmed ayaa lagu wargeliyay in wixii maanta ka dambeeya aysan Cabdiraxmaan uga wakiil noqon karin kiiska loo haysto.
Warqad uu maanta soo saarey CC Shakuur ayaa lagu wargeliyay Gudoomiyaha Maxkamadda Racfaanka ee gobolka Banaadir inuu wakaaladda qareenimo kala laabtay saddexda qareen.
Cabdiraxmaan ayaa sheegay in aysan qareennadaasi ku matalin dacwada uu soo cusboonaysiiyay Xeer ilaaliyaha Guud ee Qaranka Axmed Cali Daahir, oo uu sharci darro ku tilmaamay.
Dhanka kale, Maxkamadda Racfaanka gobolka Banaadir ayaa dib u dhigtay dhageysiga Dacwada loo haysto CC Shakuur, kadib markii qareenadii matalayay kalsoonida lagala noqday islamarkaana aysan haysan wax wakaalad ah.
Qoraal kasoo baxay Maxkamadda ayaa lagu xaqijiyay in dacawada dib loo mudeeyay maalinta Arbacada ah, 3-da bisha January ee sanadka cusub 2018-ka.
Lama oga inuu Cabdiraxmaan Cabdishakuur uu tagi doono Maxkamadda, maadaama uu gebi ahaanba kasoo horjeedo in kiiskiisa dib loo soo celiyo, maadaama ay go'aan ka gaartay 21-kii bishan Maxkamadda gobolka Banaadir.
GAROWE ONLINE
