Faahfaahinta weerar AS ku qaadey saldhig boolis oo ku yaala duleedka Muqdisho

Siyaasiyiin & Xildhibaano ayaa muddooyinkii la soo dhaafay dhaliilayay habaca ku yimid howlgalka ka dhanka ah AS.

Marka (GO) - Warar dheeraad ah ayaa kasoo baxaya weerar AS ay ku qaadeen fariisin ciidamada dowladda ay ku leeyihiin agagaarka deegaanka Busleey ee koonfurta magaalada Muqdisho.

Khasaaro xooggan ayaa lagu soo warramayaa in uu ka dhashay weerarkan bilawday subaxnimadii hore, sida ay sheegeen ilo xog ogaal ah.

Taliye Liibaan Golcad oo ka mid saraakiisha ugu firfircoon Ciidamada Dowladda iyo Boolis Militaare ayaa la xaqiijiyay in uu ku geeriyooday weeararka iyo tiro kale oo askar ah.

Saldhiga la weeraray ayaa ku sugnaa Ciidamo ka tirsan Booliis Militaare, Haramcad iyo Hay’adda Nabadsugida.

Dowladda ayaan wali shaacin tirada rasmiga ee ku geeriyooday dagaalka, halka ilo ka tirsan dadka deegaanka ay sheegaayaan in kooxda AS ay la wareegtay Saldhigga.

Siyaasiyiin, Xildhibaano ka tirsan labada gole iyo Khubaro dhanka amaanka ah ayaa muddooyinkii la soo dhaafay dhaliilayay habaca ku yimid howlgalka ka dhanka ah AS, iyagoo ka digay halista ku leedahay guulaha laga gaaray.

GAROWE ONLINE