Ilaalo hotel oo loo xukumay dilka taliye ka tirsanaa ciidanka Soomaaliya

MUQDISHO, Soomaaliya – Maxkamadda Ciidamadda Soomaaliya ayaa maanta oo Arbaco ah waxay dil toogasho ku xukuntay laba kamid ah afar eedeysane oo "lagu helay dilka taliye ka tirsanaa kumaandooska".

Maxamed Suleymaan Abiikar [Maxaadey], taliyihii ururka Gorgor, iyo Ismaaciil Maxamuud Maxamed, oo ilaaladiisa kamid ahaa, ayaa bishii October ee 2019-kii lagu dilay kontaroolka huteel Maa'ida.

Afarta eedeysane ayaa kamid ah ilaalada hoteelka oo horey loo aqooni jiray Naasa Hablood ayna saami ku leeyihiin mas'uuliyiin.

Xasan Shuute Cusmaan iyo Juule Gaabow Ibraahim oo booliska iyo milatarga ka kala tirsan kana mid ahaa ilaalada hoteelka ayaa lagu xukumay dil toogasho kadib markii ay ku cadaatay in ay rideen xabadaha.

Sidda ku xusan warqadda xukunka xeer-beegtada, Xasan Shuute iyo Juule Gaabow waxay wada rideen rasaasta geerida keentay.

Sidoo kale, waxaa min shan sano oo xarig ah lagu riddayMukhtaar Cabdullaahi Muuse iyo Salaad Xayle Macalin oo meesha jooga.

"Ciidii aan ku qanacsaneyn xukunka waxaa u furan racfaan," ayuu hadalkiisa kusoo gabagabeeyay Xasan Cali Nuur [Shuute], gudoomiyaha Maxkamadda Ciidamadda oo xukunka u mariyey warbaahinta.

Xukunadda ay maxkamadda ciidamadda ku riddo askarta dowladda federaalka ah ee dilalka ku eedeysan ayaa fulintoodu qaadataa waqti badan, waxaana arrintaas ay dhalisay su'aalo aan wali jawaabo cad loo helin.

GAROWE ONLINE