Mareykanka oo cafiyey deyn uu ku lahaa Dowladda Soomaaliya

WASHINGTON, US – Ilhaan Cumar oo war-saxaafadeed soo saartay ayaa waxay bogaadisay dedaaladda haatan socda ee deyn cafinta Soomaaliya.

Sidda laga sigtay bayaanka, Aqalka Hoose ee Mareykanka ayaa cafiyey miisaaniyad ay ku jirto deyn cafinta Soomaaliya. Tani ayaa guul u ah xukuumadda Muqdisho.

Qoraalka ayay ku sheegtay in deyn cafinta aysan kaliya faa'iido igu jirin Soomaalida dalka ku nool, balse ay ahmiyad u leedahay qurbe-joogta.

Faa'iidooyinka waxaa kamid ah in waddanka uu qaadan karo deyn cusub, hadii laga dhaafo qaanta lagu leeyahay, kobac dhaqaale, maalgelin iyo horumarinta kaabeyaasha dhaqaalaha.

Sidda ay sheegeen mas'uuliyiinta, deynta lagu leeyahay Soomaaliya ayaa gaareysa aduun lacageed dhan in ka badan shan bilyan oo Doolarka Mareykanka ah.

Hay'adda Lacagta Aduunka ee IMF iyo Bangiga Caalamka ayaa xukuumadda federaalka ah hordhigay shuruudo dhowr ah oo ay sheegeen in looga deynta cafin karo.

Shuruudaha ayaa waxaa kamid ah; mideynta canshuuraha gudaha laga uruuriyo, la dagaalanka musuqmaasuqa iyo dib-u-habeyn lagu sameeyo hanaanka maaliyadda.

"Wax badan oo ay waajib tahay in la sameeyo ayaa harsan; xoojinta dimuqraadiyadda, xuquuqul insaanka, xiriirka Villa Soomaaliya, maamuladda iyo dadka. Mareykanka door buu ka cayaari karaa," ayay tiri.

Ugu dambeyntii, Ilhaan Cumar ayaa waxay ku nuux-nuux satay in ay sii wadi doonto ka shaqeynta dalka "Soomaaliya oo dimuqraadi, xor iyo nabad ah, taasoo dhamaanteena aanu dooneyno in aan aragno".

GAROWE ONLINE