Maalinta Shaqaalaha Aduunka oo si weyn looga xusay Soomaaliya iyo Caalamkaba

Shaqaalaha hay’adaha dowladda ayaa la fasaxay maalintan.

Muqdisho, Soomaaliya - Maanta oo ah 1-da bisha May waa maalinta shaqaalaha aduunka, waxaana loo arkaa maalin fasax ah, iyadoo dhamaan shaqaalaha hay’adaha dowladda ay fasax ku maqanyihiin.

1-da May ayaa loo doortay in lagu xasuusto shaqaalihii iyo hoggaamiyeyaashii ee dhintay, iyaga oo ku baaqaya in saacadaha shaqada lagu ekeeyo 8 saacadood maalintii lana hagaajiyo duruufaha ay ku shaqeeyaan.

Asalka maalintan ayaa loo aaneynayaa shaqo joojintii weynaa ee ka dhacday magaalada Chicago ee dalka Mareykanka sanadkii 1886-kii, iyadoo Mareykanka iyo wadamo badan oo Yurub ka tirsan ay xilligaasi hantiwadaaga uga gudbaayeen “imperialism”.

Hanti-wadaagayaashu waxay sii kordhiyeen waqtiga shaqada, iyo xooggeeda si ay si degdeg ah u kiciso horumarka dhaqaalaha, waxayna si naxariis darro ah uga faa'iideysteen shaqaaluhu 14 ilaa 16 saacadood maalintii iyaga oo siinaya mushahar yar.

Dalka Soomaaliya waxa uu ka mid yahay dalalka caalamka ee maanta u dabbaaldegaya xuska sanadguurada ka soo wareegatay aasaaskii ururka shaqaalaha dunida iyo aasaaska ururka shaqaalaha Soomaaliya.

Ra’iisul Wasaaraha Xukuumadda Jamhuuriyadda Federaalka Soomaaliya Xamsa Cabdi Barre ayaa dhankiisa ka mid ahaa hogaamiyeyaasha hambalyo ku aaddan maalinta Shaqaalaha Adduunka u diray dhammaan shaqaalaha Soomaaliyeed iyo qoysaskooda.

Ra’iisul Wasaaraha oo ku bogaadiyey Shaqaalaha Soomaaliyeed maskaxda iyo muruqa ay geliyeen horumarinta dalkeenna, ayaa xusay doorkooda muhiimka ah ee ku aaddan sidii dalkeennu uga soo kaban lahaa dib-u-dhicii gaaray.

GAROWE ONLINE