Maareeye loo magacaabay Hay’adda Duulista Rayidka Soomaaliya
-
WARIYAHA MUQDISHO GAROWE ONLINE
- Posted On 22-06-2020, 08:50AM
MUQDISHO, Soomaaliya – Madaxweynaha dowladda federaalka ah ee Soomaaliya, Maxamed Cabdullaahi Farmaajo, ayaa maareeye cusub u magacaabay Hay’adda Duulista Rayidka Qaranka.
Madaxtooyadda Qaranka oo shaacisay magacaabida ayaa mas’uulka cusub waxay magaciisa ku sheegtay Axmed Macalin Xasan.
War qoraal ah oo Isniinta maanta ah kasoo baxay Villa Soomaaliya ayaa lagu caddeeyay in madaxweyne garab taagan yahay mas'uulka cusub una rajeynayo in uu ku guuleysto waajibaadkiisa culus.
"Madaxweyne Farmaajo ayaa u magacaabay Maareeyaha Guud ee Hay’adda Duulista Rayidka Mudane Axmed Macalin Xasan, wuxuuna Eebe uga baryay inuu la garab galo masuuliyadda culus ee loo igmaday," ayaa lasoo dhigay barta Facebook ee Madaxtooyadda Soomaaliya.
Magacaabidaan ayaa kusoo aadeysa xilli madaxweynuhu isla maanta uu qalinka ku duugay Sharciga Duulista Rayidka Soomaaliya.
Sidda uu fahansan yahay Garowe Online, Axmed Macalin Xasan ayaa bilooyinkii lasoo dhaafay wuxuu si ku meelgaar ahaan u haayey xilkaas.
Xisbiyadda mucaaraadka ayaa ku eedeeyay dowladda federaalka ah ee Soomaaliya in ay "hub siyaasadeed ahaan u adeegsato maamulka hawada kana joojiso socdaalka siyaasiyiinta dhaleeceeya".
GAROWE ONLINE
